Priyanka Chopra UN Ambassador aṭanga ban turin phut
Pakistan Minister for Human Rights Shireen M Mazari chuan UNICEF Executive Director Henrietta Fore hnenah lehkha thawnin, Bollywood star Priyanka Chopra chu UN Goodwill Ambassador for Peace aṭanga ban turin a phut.
Bang tura a phut chhan hi mahni ram leh hnam ṭan hlura a puh avang leh, J&K chungchanga Modi hmalakna a thlawp vang a ni. UN Goodwill Ambassador for Peace chanvo leh a hna chu remna leh muanna kawnga hmalak a nih laiin, India thlawp zawnga Priyanka a ṭawngchhuak kha Pakistan hian a ngai thei lo a ni ber.
Shireen M Mazari hian a lehkha thawnah hian, Modi kaihhruai sorkarin Kashmir leh Assam chungchanga a hmalakna mai piah lamah, BJP policy chu na takin a dem a ni. Nazi ho ang maia cheah India chu puhin- chi inthliarna, mi dang chanvo leh mawhphurhna laksakte chu India chet duh dan niin a ziak. UNSC resolution kalha cheah India chu a puh bawk.
UN-in Priyanka an dem ve lo
UN thupuangtu Stephane Dujarric chuan UNICEF Goodwill Ambassador Priyanka Chopra hian a duh sawi thei tura zalenna a neih thu a sawi ve thung. UN hian Pakistan beisei angin thil an kalpui lem lo fo a ni. Ram eng emaw zat chuan Kashmir buaina chu ramchhung buaina a nih thu sawiin, India hmalaknaa inrawlh an tum loh thu an lo sawi tawh bawk.
August thla tir khan Los Angeles-a Beautycon panel talk neiha Q&A hunah Priyanka Chopra hi Pakistan nula Ayesha Malik chuan 'ṭha der'-ah puhin a lo chhuahchhal tawh a. J&K chungchanga February 26-a Twitter-a 'Jai Hind" tih leh #IndianArmedForces tih a post avangin a hmaichhanah a lo sawisel tawh bawk a ni.