0389 Screening Gala
Zonet leh Believing is seeing projek serial 0389 Screening Gala chu Ningani zanah khan Vanapa Hall-ah neih a ni a, he hunah hian Zonet chuan an Over The Top (OTT) media service an tlangzarh nghal.
0389 Screening Gala hi PC Zonuntluangi'n a host a, Zonet director LV Lalthantluanga chuan BISP nena an intawn dan leh OTT media service chungchang sawiin, 0389-a thathawhtute chawimawina leh lawmpuina hlan nghal an ni bawk. "0389 hi Mizo kutchhuak a nihna lai hi a hlu a ni," tiin kalkhawm mipuite chu ngaihhlutpui turin a sawm.
BISP khaipa Raymond Kawlni chuan an serial siam chungchang sawilangin, BISP chuan ṭhalaite tana film-making chu eizawnna tlaka siam a, hemi kawnga sulsutu nih a tum thu a sawi. He huna kalkhawmte hian 0389 Episode 5 an thlir ho nghal a ni.
Eps 5 'Thihna ata Thihna'
0389 hian beisei a pha lo titu an tam ngei ang, mahse episode 5 erawh a dan a dang ta deuh e. Episode hmasaa kan hriatthiam loh tam tak hrilhfiahna hmuh tur a awm chho a, 0389 story kalzel dan tur thui takin a hril. Maggie bo dan maksak tak khan eng nge a hrinchhoh a, Ashley thil hriat a dik dawn em tih pawh hriat a chakawm tawh hle bawk. Zara-te ṭhiandun hausa thutin eng nge nghawng a neih zel dawn tihte kan hre chho zel bawk dawn a, mipuiin kan hlut chho zel dawn em tih chu a story kal zel dan turin a hril thui ang.