Ma Anand Sheela lemah Priyanka Chopra

Priyanka Chopra Jonas chu Amazon Prime Video tih chhuah thar tur film, Sheela-ah Ma Anand Sheela lemah a chang dawn tih Hollywood Reporter chuan a tarlang.

He film thar turah hian Barry Levinson chu director a ni dawn a, thil tak tak thleng behchhana siam tur a ni. Bhagwan Shree Rajneesh, Osho tia hriat lar chanchin tarlanna film a ni dawn a, Osho personal secretary Ma Anand Sheela lemah Priyanka hi a chang ang.

Sheela-ah hian Priyanka hi co-producer tur a ni nghal bawk dawn. He film hi US, Oregon-a thil thleng '1984 Rajneeshee bioterror attack' zulzuia siam tur a ni a, kha thil thlengah khan restaurant-a an thil ei turah mihring tana ṭha lo telh a nih avangin mi 751 lai an dam loh phah a ni. He thil thlenga mawhphurtu bera puh chu Bhagwan Shree Rajneesh zuitute an ni a, a hnarkaitu bera puh chu Priyanka-in a lem a chan tur Ma Anand Sheela a ni.