ZOTE HONDA ṬHAZUAL FAKNA-ah Esther Khiangte A thiam ber

Zote Honda Ṭhazual Fakna chart-ah Esther Khiangte 'An eng reng ang' chuan thlan a hlawh ber a, chart-ah pakhatna a ni. The Prophets 'Mangang Authawm' chu thlan hlawh ber dawttu a ni a, Malsawmdawngkimi 'A lo kal thuai dawn' chu pathumna a ni bawk.

Ṭhazual Chart top 10-ah hun eng emaw chen a cham tawh a, tunah chuan a tluk tu an awm ta lo. Ṭhazual-a mikhual lo tak Esther Khiangte chuan a hla 'An eng reng ang' a rawn chetṭhatpui hle a ni. 

' An eng reng ang' hi Mizote rilrem zawng tak hla a ni bawk a, pakhatna a ni thei pawh hi a mak lo. K. Ramdinzauva phuah a ni a, recording hi Melody Recording Studio-a an tih a ni thung. Music Video hmuhnuam tak mai hi BCM Audio Visual kutchhuah a ni bawk.

He hla hi May 13 khan MDM YouTube channel-ah dahchhuah a ni a, YouTube lama comment pawh chhiar a nuam hle a, mipuiin an hlut hle tih a hriat. A hla thu a ṭhat piah lamah Esther-i hian a sa thiam hle bawk a, en leh ngaihthlak manhla tak a ni.

Tunṭum Ṭhazual chart-ah hian The Prophets chu pahnihna an ni a, an hla tihchhuah thar mawi tak mai 'Mangang Authawm' chu hma an rawn sawnpui zel. 'Mangang Authawm' hi 2010-a an siam daih tawh kha a ni a, tunhnaiah Music Video siamin ngaithlatute beng fah tak music an rawn chhawpchhuak a ni.

Pathumnaah hian chart-a pakhatna pawh lo ni tawh Mal­sawm­dawngkimi'A lo kal thuai dawn' tih chu a awm a, chart hmasaah khan palinaah awmin tunah hian hma a rawn sawn ve leh thung. Chart hmasaa pakhatna Ocean Avenue 'Lalpaah lawm la' chu palinaah an tla thla ve leh ta thung a, panganaah hian Thawhlehnaniropuia 'I tan ka hlan e' chu a rawn invawrh ve leh ta thung a ni. Thawhlehnaniropuia hian hma a sawn chho zel a, eng chen nge a thlen dawn tih chu hriat a chakawm hle.