Myanmar sipaiten Suu Kyi hren hun an pawtsei
Myanmar sipaite chuan civil hruaitu an hren mek, Aung San Suu Kyi chu February 17 thleng an hren chhunzawm dawn.
February 1-a sipai chakna hmanga mipui sorkar thuneihna hnehchhuh a, Suu Kyi leh hruaitu dang eng emaw zat man an nih hnuah Myanmar mipuite chuan hruaitute chhuah tur leh, civil sorkar kuta thuneihna pek kir leh tura phutin nawrh an la huaihawt chhunzawm reng a ni.
Suu Kyi hren hun hi nimin khan a tawp dawn a, mahse sipai hruaitute chuan February 17 thleng atan pawtsei lehin, naktuk hian video conference hmangin court-ah a inlan dawn niin a ukil Khin Maung Zaw chuan a sawi. Sorkar thuneihna hnehchhuh a nih hnua sipaiten pawn chhuak thei loa an hren, Suu Kyi hi phalna nei loa ramdang aṭanga walkie-talkie lakluh a kawl avangin thubuai siamsak a ni.
Pathianni zan khan Myanmar ram pumah internet hman theih lohin titawp a ni leh a, khawpui lian hrang hrangah security force-te dah belhin, sipai motor lian pawh dah luh a ni hlawm bawk. Hetih lai hian nimin thleng khan khawpui hrang hrangah sipaite chet dan duh lohna lantir chhunzawm reng a la ni a, hruaitu mante chhuah tura an phutna thu te, dan loa mi an man ṭhinte titawp tura sipaite an phutna thuziakte an keng.
Civil Disobedience Movement hmanga sipaite chet dan duh lohna lantirna hi sorkar hnathawk tam tak pawhin an thlawp a ni. Pathianni khan US, Canada leh Europe ram 12 ambassador-te chuan Myanmar security force-te chu nawrh huaihawtte laka tharum hmang lo turin an ngen a, political leader leh activist man an nih chu an dem thu leh, ramchhunga inbiakpawhna awmte sipaiten an thunun sak chu an dem thu an sawi. Myanmar mipuiten democracy, zalenna leh boruak muanawma awm theihna tura an beihna chu an thlawp thu an sawi bawk.
Sorkar thuneihna chhuhsaktu, senior general Min Aung Hlaing kaihhruai sipaite chuan an thiltih chhan hi nikum November thlaa inthlanpui an neiha dik lo taka thiltih awmte sorkarin ngaihven lo a, a chhui chian duh loh vang niin an sawi. Mahse state election commission chuan sipaite thusawi hi hnawlin, inthlanpui neihah thil dik tawk lo a awm nia an sawi chu finfiahna engmah a awm lo a ni, a ti.