Mystical Mizoram Ṭhazual Lengzem-ah Jaui 'hlutna' a la ngai reng

Mystical Mizoram Ṭhazual Lengzem chart-ah chart hmasaa roreltu Jaui bawk pakhatna  a ni leh. Jaui hian a hla hit 'I Hlutna' hmangin chart-ah ro a rel nawn leh.

Jaui hla mawi tak mai 'I Hlutna' hian thla thum chhung lekin YouTube-ah thlirtu maktaduai 1.15 chuang a nei tawh a, tunhnaia lengzem hla tihchhuah zingah chuan lar ber zinga mi tih loh rual a ni lo a, pakhatna a ni nawn pawh hi a mak lo hle. 

Zonet Ṭhazual award 2020-a Best Female Artist Lengzem award dawngtu Jaui hian Valentine's Day pual khan hla thar a tichhuak leh tawh bawk a, chu pawh chuan YouTube-ah lawm a hlawh leh tawh hle. Chart-ah a inlan pui leh thuai a rinawm. 

'I Hlutna' hlutna a zual zel a, chart lehah ro a rel chhunzawm dawn em tih hriat a chakawm tawh. Tunhnaiah Mizo lengzem hla ṭha tak tak a chhuak tam a, artist lar thar duhawm tak tak an tam bawk. Chumi avang chuan Lengzem chart pawh hi a la hlu zual zel dawn tih a hriat a, kumin chu chart boruak pawh a 'hot' chho viau ang tih a rinawm.

Ṭhazual award 2020-a Best Duo dawngtu Essy ft. JT Production-te hla 'Min ui lo mi' chu chart-ah a sang ber dawttuah a awm nawn leh. Jaui ang bawkin chart hmasaa an dinna ngaiah an la ding a, chart lehah an ke an pen dawn em tih hriat a chakawm tawh hle a ni.

Mizo Idol star Rachel Lalnunkimi 'Di ṭhen lunglen' chu chart hmasaah top 3-ah lang pha lo mah se tun chart-ah erawh pathumnaah a rawn inhlangkai ve leh ta a, a dinhmun a ṭha sawt hle.

Mystical Mizoram Ṭhazual Lengzem chart top 10-a artist langte an ṭha rual hle. Zorinzuali Khiangte 'O' chu palina a ni a, tunlaia a hla rawn tihchhuah hit thei tak Rebecca Lallawmsangi  'Dam dam' chu pangana a ni.

Keimah Senes, Tlangval Tlumtea ft. Lil Me, Mabiaki Pachuau, Nathaela Vanchhawng, Rempuii Ralte leh PC Lalnunpuii te chu top 10-ah an lang bawk.