DCEU fan-te tana V Day present duhawm
Valentine's Day ni, Pathianni khan film director lar Zack Snyder-a'n a rilru zawng zawng a senna, a film buaipui Zack Snyder's Justice League trailer thar chu a sawi lawk ang ngeiin tihchhuah a ni ta a, fan-te an phur tawh lutuka an phawklek a ni ber.
YouTuber eng emaw zat chuan an channel-ah trailer chhuah ruala 'react' nghal theih turin ruahmanna an siam a, chung 'react' en tu ringawt pawh chu an tam hle. The Hollywood Reporter chuan Zack Snyder's Justice League trailer thar a review-naah 'four-hour cut re-vamps' tiin a tarlang deuh kher a, hei hian Director's cut ni satliah loin chul mam leh a awm nual tih a sawi chiang. Snyder-a Justice League original version hi March 18 hian HBO Max-ah tlangzarh a ni dawn a, kumina film tlangzarh tur zinga thawm nei ring ber pawl a ni a, fan-te'n a ngena an ngen chhuah a ni bawk a, a hmuhnawm beisei ang.
Snyder hian a hmain trailer a lo tichhuak tawh a, chumi hnuah teaser tawi te te, video leh thlalak pangngaiin a tichhuak zeuh zeuh a, niminah trailer pangngai dang a tichhuak leh bawk. Heng trailer leh teaser zawng zawng en hi chuan kum 2017-a kan en tawh Justice League-a kan la hmuh ngai lo scene a tam dawn tih a chiang.
Misual lamah pawh Steppenwolf ringawt kan hmu dawn lo a, Darkseid kianga Desaad leh Granny Goodness-te ding hmuh tur awm ringawt pawh kha a phurawm tawh a, Superman-in a cape dum a ha te, Batmobile lian tak mai hmuh tur awm te, Darkseid chibai buka Steppenwolf a ṭhingṭhi te kha fan-te tan chuan phawklekna tham pawh a ni ve reng a. Khang zawng zawng kha 2017 JL-ah khan hmuh tur a awm miau lo.
Joker-in a sawi tur a sawi ta!
Trailer a tawp tawh dawn emaw tih hnuah Jared Leto Joker chuan fan-te'n Joker-in sawi se an tih si, an beisei ngam si loh ṭawngkam a rawn chhak chhuak a, chu chu Social Media leh YouTube-a trailer comment tu tam berin an sawi zui nasat ber pawh a ni.
'We live in a society' meme leh Joker character hian kum eng emaw zat chu inkungkaihna an nei tawh. Mahse Joker character-te zingah he ṭawngkam hmang hi an la awm lo. Snyder-a JL trailer thar tawpah erawh 'We live in a society, where honor is a distant memory' tiin Joker chuan Batman hnenah a sawi a, hei hi social media titi tui ber a ni nghal.