MPL Kickoff-ah Rimawi leh ennawm

Mizo zaithiam zinga a 'top' tling ṭhiauin Mizoram Premier League theme song 'Ni e maw' remix an sa dawn a, Lammualah an zai dawn ni mai loin lam hmuhnawm nen an entir dawn - September 5, 2019 zan dar 6:30-ah MPL Kickoff a hmuhnawm dawn.

DJ Lalvenhimi, Mizo Idol Jerry Lalrinawma, Amtea, Feli Fanai, Jaui leh Michelle Varte-te an che dawn. Hei mai hi a ni dawn lo, Kimkima, Hlim­hlimi leh Lawmi Khiangte kan hmu bawk ang - lam thiam hmuh­nawm an la awm cheu ang.

USA lamah chuan an infiamna ngainat American Football final (Super Bowl) lamah an half time show chu entertainment hmuhnawm leh ngaihhlut ber pawl a ni a, entertainment event lian nei tam vak lo Mizoram tan MPL Kickoff hi hmuhnawm, ennawm, ngaihnawm leh nghahhlelhawm a chang ve thei dawn em le?

Mizoram Premier League chuan season 8 an hmang dawn tawh a, hall chunga kickoff function an neih ṭhin chu Lammualah an suan lut dawn. Kum dangah chuan MPL ṭan hma deuhin hall chhungah sawm bikte nen function neih ṭhin a ni a, tun ṭum chu mipui mimir chhim theihin Lammualah a ni dawn a, inkhelin a zui ang.

MPL Kickoff-in a ken tel chu 'jersey display' a ni a, hetah hian Mizoram top model-te hmel kan hmu ṭhin a, kuminah hei hi an chhunzawm leh ang. Hei bakah hian Grass­roots Football drill hmuh­nawm tak naupangte'n an entir ang a, MPL player-te inhmelhriattirna hmun a awm ang a, Mizo foot­baller ṭha leh langsarte pawhin he hun hi an hmanpui ang.

Rosangliana (Zo-Rock) hla ṭang ṭha tak mai, football ngainatute tan chang ni lo rimawi ngainatute tan pawha ngaihnawm chu 'Ni e maw' tih hla hi a ni. He hla hi amah Zo-Rock hian a sa lar a, tun hmain MPL Kickoff-ah zaithiam dangte pawhin an lo sa tawh.

Kumin chu a dan a dang dawn, Bluewave Records lamin music arrangement thar nen he hla hi an rawn pho chhuak dawn a, a zai turte hi a mal pawha 'sawm tham' ṭhiau an ni. Mizo Idol star Jerry zai­thiam zia kan hria a, Mizo mipaa zai ngaihnawm zinga mi leh performer ṭha Amtea a inlan tel dawn. Mipa lam an hraw viau a, hmeichhe lam an nêp bik lo - DJ-i hi Mizo mipuite hmelhriat thartir a ngai tawh lo a, live-a a zai leh lam ngainat hlawh tak Jaui a awm dawn a, chuai thei lo personality nei ṭha tak Michelle Varte tel dawn mai bakah Feli Fanai ngei mai kan hmu tel dawn a ni.

Zaithiamte hla khatah an inkhung khawm dawn lo - Kimkima a zai dawn a, Lam­­muala sound ṭha tak hnuaiah a zaipui dual dual theih ang. Hlimhlimi pawh zai tur zingah telin ani mai bakah Lawmi Khiangte a la tel cheu - Lawmi hian a hla thar a tlangzarh dawn a, hei hi MPL Kickoff zawhah Zonet TV lamah en theih nghal a ni ang.

Traditional dancer-te kan hmu dawn a, Mizo lam ngei mai nen boruak an rawn siam ang. Chutah Mizo Dance Camp-in lam naran mai ni lo, a huhoa lam runpui an nei dawn a, hei hi a hmuhnawm tham hle ang.