Box Office Film thar aiin The Croods 2 a chungnung

North America-a kar tawp liam taa theatre kaltlanga sum lalut tam ber chu nikum November-a tlangzarh tawh The Croods: A New Age kha a ni. Kar hmasa khan film thar tlangzarh a awm a, chu chu Judas and the Black Messiah niin The Croods 2 aiin sum an lalut tlem.

The Croods: A New Age hi kar tawpah khan theatre 1,890-ah an pe chhuak a, $2,660,000     a lalut. Judas and the Black Messiah chu theatre 1,888-ah pek chhuah a ni a, $2,485,000 a lalut thung.  The Little Things chuan $2,475,000 a lalut a, pathumna a ni. The Little Things hi theatre sanghnih chuanga film chhuah awm chhun a ni a, theatre 2,090-ah an chhuah.

US Box Office-a sum lalut tam ber The Croods 2 hi an tlangzarhna rei deuh tawh mah se top 5-ah a langpha deuh reng a, tlangzarh a nih tirh khan hun eng emaw chen chu chart topper a ni char char. Chumi hnuah a sum lakluh tlahniam deuh mah se tunah chuan sum lalut tam ber a rawn ni leh ta a ni. Khawvel puma a sum lakluh chu $151.4 a tling tawh.

Box Office-a pahnihna ni mek Judas and the Black Messiah hi biographical drama film a ni a, February 1 khan 2021 Sundance Film Festival-ah premiere niin Zirtawpni liam ta khan US-ah chuan tlangzarh a ni thung.

Golden Globes leh Screen Actor Guild Awards-ah a changtu zinga mi Daniel Kaluuya chuan nomination a hmu der a, critics lam pawhin he film hi an fak hle.

Box Office mojo chart-ah film 19 tarlan a ni a, chung zingah paruk chu film thar a ni. Judas and the Black Messiah bakah hian parukna Land chu film thar a ni bawk.

The Mauritanian chu top 10-ah a lang pha lo chiah chiah a, hei pawh hi film tlangzarh thar bawk a ni. Willy's Wonderland (13), The World to Come (15) leh Dara of Jasenovac (19) te chu film thar an ni bawk a ni.