Social Media khelmuala goal khung hnem ber Cristiano Ronaldo

Khelmualah a ropuizia vawi tam kan hmu tawh, vawi tam kan hre tawh, vawi tam kan chhiar tawh. Cristiano Ronaldo chu khelmual pawn lamah pawh a lo ropui e. Portuguese superstar kum 36 mi hi kar hmasa khan social media platform hrang hrangah mi maktaduai 500-in an follow tling a, hetiang record siam thei hi amah chiah a la awm.

Juventus forward hian a Facebook official page like-tu mtd. 125 a nei a, Instagram-ah follower mtd 262 chuang neiin Twitter-ah mi mtd 91 chuangin an follow bawk. Heng zawng zawng thlir hian English Premier League club 20 belhkhawm aiin follower a ngah zawk. EPL club follower neih zat hi mtd 160 vel a ni.      

Instagram hmangtu hi khawvel pumah mi tluklehdingawn khat vel an awm nia chhut a ni a, chuti a nih chuan he platform hmangtu zawng zawng aṭanga 15% chuan  Ballon d'Or winner vawi nga lai lo dawng tawhtu C. Ronaldo hi an follow tihna a ni. IG hian anmahni account follow-tu mi mtd 386 vel an nei a, chumi tih lohah chuan Ronaldo follow-tu hi an tam ber.

Instagram lamah hian Ronaldo hnaih bertu chu Ariana Grande a ni a, follower mtd 221 an awm. WWE superstar hlui Dwayne The Rock Johnson chu pathumna niin follower mtd 217 a nei a ni. Infiammi zingah chuan C. Ronaldo tih lohah chuan Lionel Messi-in follower a ngah hle a, mi mtd 183-in an follow a, Neymar chu follower ngah leh bawkin mtd 146-in an follow.

Facebook-ah pawh athlete follower ngah ber chu CR7 tho hi a ni. Facebook-ah chuan Facebook official page-in follower a ngah ber a, mtd 214 laiin an follow. Pahnihna chu  South Korean company Samsung niin mtd 161 velin an follow thung.

Nikuma Football legend Maradona a thih a, a sunna thu a post khan mi mtd 19.7 laiin an like a, hei hi nikum chhunga Instagram-a post like tu ngah ber a ni hial. Football leh social media khelmual thununtu Ronaldo hi a pain a ngaihsan em em US President hlui Ronald Regan hmingchawiin a hming an phuah a, a hmingpum chu Cristiano Ronaldo dos Santos Aveiro a ni. 

A golden boot hralh a, a hralhna sum hmanga Gaza-a naupangte ṭanpuina petu Ronaldo hi ‘Save the Children’ ambassador a nih bakah Indonesia-a ‘The Mangrove Care Forum’ ambassador a ni bawk.

(IG offical account tel loin)

1    Cristiano Ronaldo    Follower mtd 262

2    Ariana Grande    Follower mtd 221

3    Dwayne The Rock Johnson    Follower mtd 217

1    Facebook official page    Likers mtd 214

2    Samsung    Likers mtd 161

3    Cristiano Ronaldo    Likers mtd 125