Michelle Obama lemah Viola Davis chang dawn
TV series tihchhuah thar tur 'First Ladies'-ah American actress leh producer ni bawk Viola Davis chu Michelle Obama lemah a chang dawn.
He Showtime drama thar turah hian US president nupuite, an mimal nun leh khawtlanga an khawsak dante lemchan hmanga tih lan tum a ni. Season tihchhuah hmasak ber turah US president hlui nupuite Obama, Eleanor Roosevelt leh Betty Ford-te chanchin tihchhuah a ni ang.
'First Ladies' hi novelist Aaron Cooley chuan a script a ziak ang. Viola Davis leh a pasal Julius Tennon chu executive producer an ni dawn a, anni bakah hian Cathy Schulman (Welle Entertainment), Jeff Gaspin (Gaspin Media) leh Brad Kaplan (LINK Entertainment)-te pawh executive producer turte an ni.
American actress leh producer Viola Davis hi Oscars award, Emmy Award leh Tony Award-te pawh lo dawng tawh a ni a, midum hmeichhe zingah heng award pathum la thei hmasa ber a ni. Time magazine-in kum 2012 leh 2017 khan 100 most influential people-ah a hming an tarlang tawh bawk.