Joe Jonas & Sophie Turner 'Tiam tlat e' an tinawn leh sak!
Kum 29 mi Joe Jonas leh Sophie Turner (23) te chuan kar kalta Inrinni khan, France-ah a vawi hnih nan 'Tiam tlat e' an tidun leh ta. American singer Jonas leh Game of Thrones star Turner-te inneih ceremony-ah hian a hma aiin milar fuankhawm an ṭhahnem a, ualau deuh zawkin hun an hmang ve ta a ni.
Kumin May thla khan puanzar lawk awm loin an lo inkutsuih tawh a, an chhungkhat laina leh ṭhian hnai zualte bak an tel lo. Media hrang hrangah an innei ṭha leh dawn tih thawm a awm hnuin, Inrinni khan France chhim lam, Château de Tourreau an tih hmunah an innei ṭha leh ta a ni.
Tute nge inlan?
He hunah hian an chhungte ve ve an tel ṭha hle a, an ṭhian ṭhate an kim viau bawk. Joe Jonas-a unaupa Nick Jonas leh Kevin Jonas-te pawh a phusa pawlah an ṭang a, an nupuite ve ve an hruai bawk. Nick Jonas hi Priyanka Chopra chuan a ṭawiawm a, Kevin leh a nupui Danielle-te an mawi viau bawk.
Game of Thrones star Maisie Williams chuan a film chanpui Turner hi a ṭawiawm a, ani hi maid of honor a ni. Maisie Williams hi a bialpa Reuben Selby chuan a ṭawiawm ve bawk. An inneih hma hian dinner an buatsaih a, he hunah hian supermodel Ashley Graham hmel pawh hmuh tur a awm.
Château de Tourreau
An inneihna hmun Château de Tourreau hi Southern France-a awm a ni a, a hmun hi acre 90 vela zau a ni. He hmun hi security guard-te'n uluk takin an veng a, an mi sawm lo kal apiangte hi uluk takin an lo vil a ni.
Chateau de Tourreau hi 'Chateau Ventoux' tiin an sawi bawk a, room 29 a awm. Heng room-te hi an inneih pual hian an book vek a, ei leh in tur pawh a 'special' thei ang berin an ruahman a ni.
Joe Jonas & Sophie Turner
• Joe Jonas hi kum 29 a ni a, Sophie Turner erawh kum 23 mi chauh a la ni
• Kum 2016 aṭangin an inzui ṭan
• A vawi khat nan MTV EMA-ah an inlan
• Turner chuan January 2017 kha an thlalak dunna chu a vawi khat nan IG-ah a post
• Hemi kum October thla hian an inhual thu an puang
• Kumin May 2 khan Little White Wedding Chapel, Las Vegas-ah an inkutsuih
• June thla tawp lam khan inkutsuih nawn turin France an pan a, June 29 khan a vawi hnih nan official takin an inkutsuih leh ta a ni.