Ryan Renolds-te nupa Ṭanpui ngaite tan an che chhuak leh ta

Hollywood star zinga midangte ṭanpuina kawnga ke pen chak tak,  Ryan Reynolds leh a nupui Blake Lively-te chu midangte ṭanpuina atan an thawk chhuak leh ta a, North America-a Covid-19 kaihhnawiha hnathawkte ṭanpuina turin  Feeding America and Food Banks Canada hnenah $maktaduai 1 an pe.

Ṭanpui tur an awm apianga tlanchhe ngai lo Reynolds-te nupa hian nikum khan tuna ṭanpuina an peka te hnenah tho hian $500,000 an lo pe tawh a, kuminah erawh a letin an ṭanpuina pek hi an tipung. Thuchhuah an siamah,"Feeding America leh Food Banks Canada te kan ṭanpui thei hi kan inchhuang hle," tiin an tarlang.

"Nikum lama kan ṭhenawmte'n harsatna nasa tak an tawh kan hre reng a, chu chu a la zo lo a ni. US leh Canada hmun hrang hranga food bank awmte'n mamawhtute hnena chaw an pek ṭhin hna pawimawh tak ṭanpui theia kan awm hi kan lawm hle," an ti.

Reynolds leh Lively-te hi milar zingah chuan thilphal ber pawl an ni awm e. North America food bank-a sum tam tham tak an pek bakah hian chenna in nei lo leh ṭhalai mihring sumdawnna atana an hmante ṭanpuina turin Covenant House Vancouver hnenah  $250,000 an pe bawk a, Covenant House Toronto hnenah pawh $250,000 tho an pe bawk.

Kum hmasa lamah pawh khan anni nupa hi midang ṭanpuina kawngah hian ke an pen hlawk hle. George Floyd thih vanga buaina nasa tak a chhuah lai khan National Association for the Advancement of Colored People (NAACP) hnenah vun rawng vanga inthliar hranna dona atan $200,000 an pe. Heng lo pawh hi midang ṭanpuina kawngah hian ke an pen nasa hle a, Covid-19 kaihhnawihah pawh khan sum eng emaw zat an theh chhuak a ni.

Midangte tan an luang chhuak nasa bawk a, malsawmna pawh nasa takin an dawng let. Nikum lamah khan Ryan Reynolds company Aviation American Gin pawh bevarage company Diageo thuneitute nen inremna $mtd 610 hu zet an siam. Kum 2018-ah pawh khan Davos Brands premium alcohol firm co-owner nihna a nei tel bawk.

•    Ryan Reynolds hi People magazine 'Sexiest Man Alive' pawh a lo ni tawh.

•    Green Lantern film an chan aṭangin Ryan Reynolds leh Blake Lively-te hi an intawng a, kum 2012 khan inneiin fa pathum an nei tawh a ni.

•    Reynolds hi zaithiam Alanis Morissette nen pawh an lo inzui ve zuai tawh. Alanis Morissette hla 'Torch' kha Reynolds vanga a phuah a ni ve tlat.