Lauren Daigle Carrie Underwood record a khum ta

American gospel singer lar Lauren Daigle chuan mi bik a nih zia pholangin record duhawm tak a siam ta rup mai. Lauren Daigle hian Hot Christian Songs chart-ah a zawnin kar 27 chhung teh meuh No.1 a hauh a, Carrie Underwood record a rawn khum ta a ni. 

'You Say' singer hian kar hmasa khan chart-ah dinhmun sang ber luahin, record ding lai a nih rual. American singer ve tho Carrie Underwood chuan kum eng emaw zat chu No.1 hauh rei ber record a lo chelh tawh a, Lauren Daigle hian a rawn khum ta a ni. 

Lauren Daigle hian a hla hit 'You Say' hmangin record thar hi a siam a, dinhmun sang ber a luah zui zel thei ang em tih chu hriat chakawm tak a ni.  

American singer Carrie Underwood hian kum 2014 khan 'Something in the Water' a tichhuak a, hun rei tak chhung Hot Christian Songs chart-ah roreltu a ni. Ro a rel a ni sa tliah mai lo a - kar 26 chhung zet a zawna No.1 hauhin record a siam hial a ni. Tun hma lamin hetiang tithei hi an la awm ngai lo a, sawi nep chi rual a ni lo. 

Kum 2019 a herchhuah hma zawng kha chuan Hot Christian Songs chart-ah roreltu pakhat a awm a, Lauren Daigle lo lan hnuah erawh thil a danglam ta. Lauren hian a record duhawm tak pawh a rawn thaichhe ta a ni. 

Kristian singer lar Lauren Daigle chanchinin ngaihven a hlawh a, a ropui zia an insawi siak a ni ber. A record chuanawm tak avangin ngaihsan a hlawh a, lawmpuitu pawh an ṭhahnem hle a ni.

Kum 27 mi Lauren Daigle hi tunlai gospel singer zingah chuan hriat hlawh berte zinga mi niin, country singer lar Carrie Underwood record hial a rawn khum tak hnuah phei chuan sang takah a rawn invawrh a ni. 

'Light Of The World' singer Lauren hian nikum July thla khan 'You Say' a tichhuak a, beisei phak bakin a hit. He hla hmang hian Hot Christian Songs chart-ah ro a rel a, thla ruk a liam meuh chuan record thar duhawm tak a rawn siam ta a ni. 'You Say' hi nikum July 13 khan YouTube-ah upload niin, mi maktaduai 59 chuang zetin an en tawh a ni.