Oscar Award Lady Gaga leh Bradley Cooper perform dawn

Film industry-a chawimawina ngaihlut ber Oscar Award chu February 24 hian sem a ni dawn a, zaithiam inlan tur pawh an awm nual dawn. Chung zingah chuan Lady Gaga leh Bradley Cooper te chu boruak nei lian ber an ni a, Jennifer Hudson inlan turin ngaihven a hlawh viau bawk. 

'A Star Is Born' star Lady Gaga leh Cooper te hian an hla hit 'Shallow' an thlawh dawn a, en chakawm tawh tak a ni. Tun hnai khan he hla hi live-in an lo perform dun tawh a, mipuiin an hlut rem rem hle. 

Lady Gaga-i'n Las Vegas-a show a neih ṭumin Cooper hi rin loh takin a inlan a, 'Shallow' hi an perform dun a ni. American star te inkawp hian khawvel an dengchhuak a, film industry-a award ngaihhlut ber Oscar Award-ah hial perform tura sawm an ni ta a ni. 

Academy of Motion Picture Arts and Sciences (AMPAS) chuan Lady Gaga leh Cooper te perform tur thu hi Zirtawpni khan Twitter kaltlangin an puang a ni. 

 

American singer Lady Gaga hi music huangah chuan artist ropui berte zinga mi a ni a, film industry-ah erawh mikhual mai a la ni. A mikhualna ramah hian a tlatlum hle thung a, tunah chuan chawimawina ngaihlut ber dawng thei dinhmunah a ding der tawh!

Lady Gaga hian a zaithiamna chu film industry-ah pawh senglutin, 'A Star Is Born' theme song chu Cooper nen hian an sa dun. An sa liam satliah mai lo tih a langchiang tulh tulh a, award sem hrang hrangah an hming a lang chho ta zel a ni. 

Kumtir lam khan Golden Globes Award-ah Best Song an la lo la tawh a, Oscar-ah pawh Best Original Song category-ah award dawng thei tura chhawpchhuah niin - chawimawina dawng tur pawhin a khan hle. 

Lady Gaga hi Hollywood-a sulhnu nei ṭha tak takte nen huang khatah an awm der tawh a, Best Actress ni thei dinhmunah a ding mek. Best Actress hi award ngaihhlut berte zinga mi a nih avangin chawimawina dawng thei tura chawpchhuahte pawh mi langsar tak tak vek an ni. 

Kum 32 mi Lady Gaga hian Oscar Award hi a phu reng em tih chu zawhna awm mek a ni a, chutih rual chuan Yalitza Aparicio, Glenn Close, Olivia Colman leh Melissa McCarthy te khuma chawimawina a dawng a nih ngat chuan film industry-ah a hming a dai tawh ngai lo ang. American singer hian nikum khan film a chang ṭan ve chauh a, tunah chuan thawm nei lian berte zinga mi a ni der tawh. 

Actor a ni a, Hollywood star zingah pawh hriat hlawh berte zinga mi a ni. Chutihrual chuan zai lamah erawh a mikhual viau a, Lady Gaga nena an zaidun pawh hian mak tih a hlawh hle. 

Film lama a hlawhtlin tluk zetin zai lamah pawh a duai lo a, tunah chuan Oscar Award-ah perform tura thlan a ni ta reng mai. Hei mai hi ala ni lo - Best Original Song category-ah award dawng thei tura chawpchhuah a ni. Kum 44 mi hi Best Actor dawng thei dinhmunah a ding mek bawk a, Christian Bale, Willem Dafoe, Rami Malek leh Viggo Mortensen te nen bukin an awm dawn a ni. 

Oscar Award-ah hian zai­thiam eng emaw zat an lo inlan tawh a, kuminah pawh perform tur an awm leh nual dawn. American singer Jennifer Hudson chu mimala langsar a ni a, ani bakah hian 'The Ballad of Buster Scruggs' theme song satu Gillian Welch leh David Rawlings te pawh an zai dawn a ni. Hetih lai hian perform tura sawi rik zinga mi American rapper Kendrick Lamar leh SZA te erawh an inlan dawn ta lo a ni. 

Oscar Award vawi 91-na hi February 24 hian Dolby Theatre, Los Angeles-ah sem a ni ang.