Super Bowl Halftime Show: Maroon 5, Scott leh Big Boi an che Entu mipui lamin duhkhawp an hmu lo?

American football game ngaihlut National Football League (NFL) championship chu Mercedes-Benz Stadium, Atlanta-ah nimin zing khan khelh a ni a, halftime show ropui takah - Maroon 5, Travis Scott leh Big Boi te an inlan. 

American pop rock band lar Maroon 5 te hian an hla hit thlawh nual mah se entu mipui lam beisei an phak lo niin a lang a -Americann Travis Scott leh Big Boi te pawh eng teh ruai an ang chuang lo. Show zawh hnua sawi zui hlawh ber pawh Adam Levine kawr pelh chungchang a ni a, entu mipuiin an duhkhawp an hmu lo niin a lang. 

Soul singer Gladys Knight chuan Super Bowl LIII khuh­hawn nan hnam hla a sa a, R&B duo Chloe x Halle te chuan 'Ame­ri­ca the Beautiful' an sa ve bawk. 

Super Bowl Halftime Show-ah an perform dawn tih a chian hnu khan fan tam tak chu lawm avangin an zuang a, an beisei leh duh ber chu chawpchhuah sak an ni ta. Maroon 5 hian 'Harder to Breath' leh 'This Love' hla nen bul an ṭan a, 'Girls Like You' thlengin an hrut. An hla lar 'Moves Like Jagger' leh 'She Will Be Loved' te pawh an perform a, entu mipui thawm pawh a ṭha hle. 

Maroon 5 perform hi Travis Scott leh Big Boi ten rawn zawmin, fan te pawh an phur hle. Scott hian Drake nena an sak 'SICKO MODE' a sa a, Big Boi pawhin 'The Way You Move' a sa ve bawk. 

Super Bowl Halftime Show-ah hian duh chen chen hun a hman ngawt theih loh a, Maroon 5 te pawh an inbuatsaihna angin an che hman lo niin an sawi. Adam Levine leh a ho te hian minute 13 chhungin hla pakua ngawt khunglen an tum a, hunin a daih lo. Hei vang hian fan te beisei angin an che chhuak zo lo a, an inbuatsaihna ang pawhin an perfom chhuak thei ta lo niin an tarlang.  

Super Bowl Halftime Show-a perform te hi a tira an duh ber an thlan chhuahte ni loin - a hnawh khahna niin sawi a awm bawk. THe New York Times chuan,"Third choice nge an nih a, eighth or 14th choice" tiin an tarlang a, hei hian beisei a phak lo hle tih a tilangah mi tam tak chuan an ngai. Kum dang zawng aiin entu pawh an tlahniam niin an sawi cheu bawk. 

Khawvela ennawm ropui an sawi zinga mi Super Bowl Halftime Show-a inlan hi thil chakawm tak a ni ngei ang. Mahse kuminah erawh he show-a inlan tur hi a zawnin an inzawng emaw tih mai tur a ni a, a tawpah Maroon 5 te an perform. 

Rihanna chu a tirah per­form tura sawi rik a ni a, mahse a hnawl. Rihanna hian American football player, Colin Kaepernick-a'n chi inthliarna lam hawia police-te chetna duh lohna a lantir chu thlawpin sawmna hi a har a ni. Zaithiam dang eng emaw zatin an hnar ve bawk a, campaign hial an kalpui a ni. Hei vang hian ṭum dang angin ngaihlut a hlawh tawk lo niin an sawi. 

Super Bowl Halftime Show-a inlan te hian sum leh pai an phut lo a, ṭanpui ngaite tan an hlan vek dawn zawk. NFL chuan Big Brother Big Sister hnenah charity atan $500,000 an hlan tur thu an lo puang tawh a, hei hi MAroon 5 te nena an inremna pawh a ni. Travis Scott pawhin midang ṭanpui nan hman a duh. 

American rapper hian per­form tura sawmna a dawn khan NFL thuneitute lamah thil phut a nei a, chumi chu an pawm theih chauhin a perform tur thu a lo hrilh. Scott hian social justice organisation Dream Corps-ah donation $500,000 hlan a phuat a, hei hi NFL lam chuan an pawm­sak a ni. Super Bowl-a inlan artist te hian sum leh paiah chuan hlawkna an tel lo tihna a ni. 

New England Patriots star Tom Brady chuan a vawi nga nan Super Bowl title a la a, mimala title la hnem ber record a siam. Brady hi a nupui Brazilian model Gisele Bündchen chuan a hmunah ṭawiawmin, an fate pawh an hruai a ni. 

Brady hi American football ngainatu chauh pawh ni lo - khawvel huapa milar tak takin an lawmpui thu an sawi. Chung zingah chuan - Keith Urban, Zedd leh Niall Horan te pawh an tel a, basketball superstar LeBron James pawhin a lawmpui thu a tarlang ve bawk. 

Super Bowl LIII-ah hian UFC star Conor McGregor pawh a hmuna entu zingah telin, a fapa a pawm lai thlalak hmuh tur a tam hle. 

Super Bowl hi January 15, 1967 khan a vawi khat nan khelh a ni a, a karah hian show hmuh nawn tak zeh tel ṭhin a ni. Tunah chuan Super Bowl Halftime Show hi US-a show entu ngah ber a ni der tawh. Nikum khan Justin Timberlake chu a perform a, mi maktaduai 106.6 zetin an en. 

Super Bowl Halftime Show-a entu tam ber ṭum chu 2015 kha niin, Katy Perry perfom chu mi mtd 120.7 zetin an en a ni. Kuminah erawh entu hi an tlahniam hle niin an tarlang a, a zat chiah erawh tarlan a ni lo. Kum 2009 hnu lamah chuan entu hi maktaduai 100 an la chuang ziah a ni.