Billboard-ah Olivia Rodrigo leh Morgan Wallen bawk an langsar leh
Billboard Hot 100, Global 200 leh Billboard Global Excl. US chart-ahte chuan Olivia Rodrigo bawkin ro a rel leh a, heng chart pathumah hian pakhatna a ni leh vek. Morgan Wallen chu Artist 100 chart leh Billboard 200 chart-ah No.1 a ni ve leh bawk.
Olivia Rodrigo 'Drivers License' a la lar zel
US tleirawl Olivia Rodrigo hi kumin kumtir aṭang khan rimawi khawvelah thinlai ril luahtu a ni, ti ila kan sawi sual tam awm lo e. A debut single 'Drivers License' chu a la hlawhtlinpui zel a, tunkarah pawh hian Billboard chart pathum laiah ro a rel leh. Heng chart pathumah hian kar hmasa khan topper a ni tawh a, Billboard Global 200 leh Global Excl. US chart-ah a ruala kar li chhung a zawna topper ni thei hmasa ber record kar hmasaa a siam chu tunah hian amah vekin a khum leh a ni.
Billboard Hot 100 chart-ah chuan Cardi B hla thar 'Up' chu pahnihna a ni a, 'Drivers License' hi a nek chhuak zo ta lo. The Weeknd 'Blinding Lights' chu pathumna a ni bawk. The Weeknd hlate hi Super Bowl half time show-a a inlan hnuah US mipuite'n an ngaithla thar nasa leh hle.
Global 200 chart-ah chuan The Weeknd 'Blinding Lights' hi 'Drivers License' dawttu chiah a ni thung a, a hla tho 'Save Your Tears' chu pathumna a ni bawk. Global Excl. US chart-ah pawh 'Blinding Lights' leh 'Save Your Tears' bawk hi pahnihna leh pathumna an ni. The Weeknd hi Super Bowl half time show a chhawr hle tih loh rual a ni lo.
Billboard the Hot 100 top 5:-
1 Drivers License Olivia Rodrigo
2 Up Cardi B
3 Blinding Lights The Weeknd
4 Save Your Tears The Weeknd
5 Mood 24kGoldn
Featuring iann dior
Sawiselna karah Morgan Wallen a la 'hit' tho
A album 'Dangerous: The Double Album' vanga a lar zual lai takin kar hnih vel liam taah khan Morgan Wallen hi a che chhia a, a ṭhiante nen an zuruih lai video an lak fuhah chi inthliarna lam hawi ṭawngkam a neih avangin sawisel leh dem a hlawh hle. Ṭum hnih lai hemi vang hian ngaihdam a dil tawh nghe nghe a, chutiang boruak karah chuan a hla ngaithlatu erawh an kiam lo.
Billboard 200 chart-ah tunkarah pawh pakhatna ni lehin a zawnin kar nga chhung he chart-ah hian ro a rel tawh. The Weeknd album 'Highlights' chu rawn invawrh viau mah se Wallen hi a nek chhuak zo ta lo a, pahnihnaah a awm a ngaih phah.
Foo Fighters album 'Medicina At Midnight' chu pathumna a ni a, Pooh Shiesty 'Shiesty Season' chu palina niin Lil Durk 'The Voice' chu pangana a ni. Morgan Wallen hi Artist 100 chart-ah pawh pakhatna a ni leh a, The Weeknd leh Foo Fighters-te pawhin he chart-ah hian an tluk lo.