India Box Office: Ni 25 chhunga vaibelchhe 200 lalut thei. Uri: The Surgical Strike

January 11-a tlangzarh Uri: The Surgical Strike chuan India Box Office-ah chetṭhat chhun­zawmin, thla khat pawh a liam hmain cheng vaibelchhe 200 a lalut tling der. Vicky Kaushal channa hian heti zat sum lalut tur hian ni 25 chiah a mamawh a ni. 

Uri hian Bollywood film lar Baahubali a khum thei ang em tih chu zawhna awm mek a ni a, tun hnaiah film chhuak thar a awm nual avangin a sum lakluh a tlakhniam phah thei bawk. 

Kum 2016 September 18 khan Pakistan firfiakte chuan Jammu and Kashmir-a Indian army headquarters an bei a, sipai 18 zet an kaphlum. He thil thleng hian sipai chhungte leh India mipui rilru a tina a, thil thlen dan hi hmuh an duh a ni. India sipai ten phubak lak nana Pakistan ram chhungah Surgical Strike an va neih film hmanga tarlan hi en chakawm tak a ni ve reng a ni.  

He thil thleng behchhana siam Uri: The Surgical Strike film hian ngaihven a hlawh a, India ram hmun hrangah chhuah chhoh mek zel a ni a, a thlen chinah a che ṭha viau zel bawk. 

A changtu lam hi 

Bollywood star Vicky Kau­shal leh Mohit Raina-te channa hi Uri hi Indian film director lar Aditya Dhar kutchhuak niin, Yami Gautam leh Kirti Kulhari te pawh a changtu zingah an tel. Vicky Kaushal chu Major Vihaan Shergill lemah changin, India sipai ten Pakistan ram chhunga hel laka beihpui an thlak dan pawh tarlan a ni. Uri : The Sur­gical Strike hi a taka thil thleng behchhana siam a nih miau avangin entu pawh an tam a, sum pawh a lalut hnem hle a ni. 

Uri: The Surgical Strike hi sum lakluh kawngah a chet ṭhat em avangin Baahubali nen an khaikhin der tawh. Bollywood film chhuak tawh zinga Box Office aṭanga sum lalut hnem ber Baahubali 2: The Conclusion hian vbch 350 vel zet a lalut a, khawvel puma a lakluh pawh vbch 720 zet a ni. Hei hu Uri hian a tluk/khum thei angem tih chu hunin a la hril dawn a ni.