Super Bowl Kum 10 chhunga entu tlem ber ṭum a thleng

American football game ngaihlut National Football League (NFL) championship chu an ram huna Pathianni zan khan Mercedes-Benz Stadium-ah khelh a ni, halftime show-ah Maroon 5 te an perform. 

Maroon 5 te hi American rapper lar Travis Scott leh Big Boi ten pui bawk mah se mipui beisei an phak lo a, kum 2008 hnua entu an tlem ber ṭum a ni hial. 

Super Bowl LIII hi a hmun leh TV aṭanga lo entu mi maktaduai 100.7 an awm a, kum hmasa aiin 3% in a tlahniam. Nikum khan mi maktaduai 103.4 in an en a, hei pawh hi 2009 hnu lama entu tlem ber ṭum a lo ni tawh bawk. Hetih lai hian NFL Championship entu tam ber ṭum chu 2015 niin, mi maktduai 114.4 zetin an thlir a, live-a pekchhuah a nih laiin maktaduai 49.7 velin an en anga chhut a ni. 

Kum 2008 hnu lamah bik chuan Super Bowl entu hi mi maktaduai 100 aia tlem an awm ngai lo a, mipuiin an ngaihlu hle tih a lang. Kum 2015 hma lam thleng kha chuan entu hi a kum telin an pung a, tunah erawh thil a danglam chho ta. 

Tun hnai kum thum chhungin entu hi an la tlahniam hret hret zel a, 2017 aia 2019-a entu tlak hniamna pawh 10% zet a tling tawh a ni. 2014-a Super Bowl entu maktduai 114.4 aṭanga teh phei chuan an tlakhnima hi a sang hle a ni. 

Super Bowl entu tlakhniam chhan hian NFL thuneitute lu a tihai hle a, Halftime Show-a inlan tur pawhin zaithiam an duh ang an ko kal thei meuh tawh lo. Hei hi a chhan ber nia lang chu chi inthliarna vang niin an sawi a, a dik ni pawhin a lang. 

Mipui kokhawmtu ber zaithiam ten chi inthliarna rawngkai avangin perform an chak lo a, sawmna hnar fithla ṭhak lah an bo lo. Kuminah pawh zaithiam lar tak tak hming lam rik a ni chungin a ṭha ber ber an perform lo niin a lang a, hei hian ngawng thui tak a nei a ni.

Barbadian singer Rihanna chu Super Bowl Halftime Show-a inlan duh lo langsar a ni a, tun ṭum Super Bowl pawh kha a en lo ṭhak! Rihanna hi a tirah perform tura sawi rik zingah a tel a, mahse a hnar ta zawk a ni. 

American football player, Colin Kae­pernick chu chi inthliarna lam hawia police-te chetna dodaltu lang­sar ber a ni a, thlawptu pawh a nei ṭha hle. Chung zingah chuan Rihanna pawh hi a tel a, perform chu sawi loh en pawh a en duh lo tih a sawi. 

Super Bowl hi kum tin neih ṭhin a nih avangin nakkum lama perform turte pawh an inrinsiak leh der tawh. Taylor Swift leh Ed Sheeran te hming lam rik a ni a, Drake leh Eminem pawh an bang bik lo. American singer Pink hming a ri ring viau bawk a, thu chiang erawh engmah a la awm lo. 

Metallica aṭanga Garth Brooks thlengin sawirik an ni a, Adam Lambert hming pawh lam zin pawl a ni. Heng bakah hian K-pop lam aṭangin BTS leh EXO te sawirik an ni cheu bawk. 

Super Bowl LIV hi nakkum Feb­ruary 2 khian Hard Rock Stadium, Florida-ah khelh tura ruahman a ni.