ZOTE HONDA ṬHAZUAL FAKNA-ah Amtea 'Lunghlu' a hlu ber

 Ṭhazual Fakna chart-a mikhual lo tak Amtea chuan May thlaa a hla tihchhuah 'Lunghlu' hmangin Zote Honda Ṭhazual chart-ah dinhmun sang ber a luah.

Dam Veng tlangval hian a hla thar 'Lunghlu' tih hi sap hla, Canadian Christian rock band Hawk Nelson hla 'Diamond' tih a lehlin a ni. A music track mawi tak hi Lal K Sailo kutchhuak a ni a, music video hi Andrew Lalbiak­kima Ralte siamsak a ni bawk.

He hla hi lam rem tak mai hla a ni a, a satu Amtea ngei pawh hian Pathian fakna atana mi zawng zawngin an lampui theih tur hla a nih thu a lo sawichhuak tawh a nih kha. Chart hmasaah khan pathumna a ni a, tun ṭumah erawh thlan hlawh ber niin, pakhatnaah a rawn invawrh ta a ni.

Chart hmasaa pakhatna dinhmun luahtu, Praise On star- Arini, Cindy leh Zorina-te pathum 'Trio' chu mipuiin an la kham thei lo a, tun chart-ah hian pahnihna dinhmun luahin, ngaihthlak an la hlawh hle. Arini aw mawi tak leh Cindy aw dangdai tak te, Zorina zai mawi takte chu mipuiin an la kham thei lo a ni.

Mizo Idol aṭanga mipuiin kan hriat Malsawmdawngkimi chuan a hla 'A lo kal thuai dawn' tih hmangin pathumna dinhmun a luah ve bawk. B Puia Zai-awi leh PL Engmawia-te hla phuah 'A lo kal thuai dawn' tih hla mawi tak mai top 3-a a lang thei hi a mak lo a, a satu hian a sa thiam bawk a, a dinhmun a sawh nghet chho zel a ni. Chart hmasa lamah khan pangana a ni a, hma sawn chho zelin pathumna a rawn ni tawh. 

Oceans Avenue 'Lalpaah lawm la' tih chuan palina dinhmun luahin, a dinhmun a sawh nghet ve mek zel a ni. Mawitei Ralte hla 'Lalpa min vengtu' chu pangana a ni thung. Lalthlengliani 'A him reng dawn si' tih chu parukna a ni a, pasarihnaah hian Esther Khiangte ' An eng reng ang' tih chu a awm ve bawk a ni.

Ruth CVL Muanpuii chuan 'Bible' hmangin pariatna din­hmun a luah bawk. Chart-ah hmel thar kan hmu a, chu chu Daisy L Khawbung 'Thlarau Thianghlim' tih a ni a, eng nge a an chhoh zel dawn hriat a chakawm tawh hle. R. Lalruatsangi 'Lawmna chibai' chu top 10-ah a lang ve bawk.