Dolly Parton-in a lim din an tum

Country music legend Dolly Parton chuan Tennessee state thuneitute chu a lim din an tum chu ti rih lo turin a ngen.

Dolly Parton chuan Tennessee state thuneitute hnenah Nashville khawpuia a lim din an tumna bill chu hnuk kir turin a ngen a, Ningani khan thuchhuah siamin,"Khawvela thil thleng mek ngaihtuah chungin, tuna ka lim lo siam hi a hun rih lo niin ka hria," tiin a sawi.

Nashville-a Parton-i lim dinna tur bill hi thla hmasa khan an state Democratic aiawh John Mark Windle chuan a pulut a, an state tana a hnathawh tawh thlir letin Dolly Parton chawimawina hi neih ṭha a tih thu a thlen a ni.

Zaithiam lar a nihna piah lamah Parton hi midangte ṭanpuina kawnga thawh hlawk tak a ni tel. Naupangte'n ziak leh chhiar an thiamna kawnga hmasawnna a awm theihna turin khawvel ram hrang hranga naupang kum nga hnuai lam hnena lehkhabu thawnna tur Imagination Library a din a, Vanderbilt University-a sum tam tham tak a thawh chu Moderna coronavirus vaccine siamna kawng atan ṭangkai takin hman a ni bawk. Chi inthliarna dona kawnga a hmalakna te pawhin fak a hlawh hle.

Dolly Parton hian thu-neitute chu lawmthu a hrilh nghal a, an thil tum chu inchawimawina nasa tak a nih thu leh zahawm a ti hle tih a tarlang tel. "Tun aṭanga kum eng emaw zat a ral hnuah emaw ka boral hnuah emaw, ka la phu nia in hriat chuan, kan state Capitol-ah hian inchhuang takin ka la din ve erawh ka beisei a ni," tiin a thuchhuah siamah chuan a ziak a ni.