Thihna kotlangah Demi Lovato a ding ngun

American singer Demi Lovato chuan kum 2018-a drug a overdose hnu khan vawi thum lai stroke a nei leh tih leh heart attack a nei bawk tih a sawi.

US pop star kum 28 mi Lovato chuan hemi chungchang hi a documentary trailer-ah a sawi chhuak a, doctor-te pawhin minute nga aṭanga minute 10 bak hun a neih tawh loh thute an hrilh hman tih te, a thluak ṭhenkhat chu a chhe hman tih te leh tun thleng pawhin chumi chuan a la nghawng tihte a sawi a ni.

A thluakah ṭha lo lai a awm avang chuan a khaw hmuh a fiah lo tih sawiin, lirthei ka khalh thei lo a, lehkha chhiar pawh harsa ka ti hle, a ti.

A tleirawl lai aṭanga a zai thiam leh lemchan thiam vanga khawvelin a hriat tawh Demi Lovato hi July 2018 khan Los Angeles-a a chenna ina nikhaw hre loa hmuh a nih avangin damdawi-inah hruai a ni a, damdawi a overdose thu a hnuah tarlan zui a ni bawk.

Social media lamah Lovato hian YouTube documentary series thar tur Dancing With The Devil trailer a share-a, he a documentary hi March 23 aṭangin tihchhuah a ni dawn.