Zaninah Hlimhlimi hla thar 'I awm vangin'

'Ṭhian rinawm' tih hla hmanga Zofate min awi tleitu Hlimhlimi chuan zanin dar 8:00 hian hla thar a tichhuak leh dawn ta. A hla thar hi  'I awm vangin' tih a ni a, TBC Zaithanpuia phuah a ni.

Ṭhazual Award pawh lo dawng tawh Hlimhlimi hian music video a lo siam nual tawh a, kuminah erawh a la tichhuak lo. 'I awm vangin' hi kumina a music video hmasa ber tur a ni dawn a, a zai ngainatute tan chuan thu lawmawm tak a ni ngei ang. 

A music video thar hi YouTube-ah upload a ni dawn a, zan lamah tichhuah a ni ang. 

Zai lama hriat hlawh tak TBC Zaithanpuia hian hla phuah pawh a lo ti thei fu mai. Hlimhlimi music video thar hi ama irawm chuak ngat a ni a, ngaihtlak pawh a chakawm tawh hle. He hla hi kum 2015-a a phuah kha niin, vawi khat vel chu a lo sa ve tawh. Duhsak takin Hlimhlimi a sak tir zui a, ani hian thiam takin a rawn sa chhuak a ni. 

Hlimhlimi music video hian hlutna tak pakhat a nei a, music leh recording hi live vek a ni. Musician ṭha ber berte nen Kings and Prophets Recording-ah an record a, video pawh hmun dang pan loin an shoot nghal vek a ni. Video hi Siama (SVP) kutchhuak niin, belhchian pawh a dawl hle. 

Armed Veng South nula Hlimhlimi chuan, "Hring­nunah chuan hlimni leh lawmini te kan nei ṭhin a, mihring nih chhung chuan lungngaihni pawh kan nei ṭhin. Lungngaihna ten min hual chang awm mah se, Pathian kan neih tawh chuan kan thla a muang ṭhin a ni. Hei vang hian he hla 'I awm vangin' pawh hi hi ka duh phah em em a, ngithlatute pawhin malsawmna an chan ngei ka beisei a ni," tiin a hla chungchang a sawi.