Ngaihven hlawh Grammy Award Cardi B, Scott, Dua Lipa leh Lady Gaga an che dawn

Music khawvela chawimawi­na ngaihhlut ber Grammy Award chu Feb­ruary 10, Pathianni zan hian sem a ni dawn ta a, kan ram hunah chuan Thawhṭanni zingah en theih a ni ang. 

Kuminah hian zaithiam lar tak tak an perform dawn a, a hmuhnawm dawn. Cardi B, Dua Lipa, Lady Gaga leh Travis Scott ten stage an luah lum dawn a, ani bakah hian zaithiam lar tak tak an inlan dawn bawk a ni. 

Grammy Award vawi 61-na hi STAPLES Center, Los Angeles-ah sem a ni dawn a, American broadcast television CBS chuan live-in an pechhuak dawn a ni. An ram huna Pathianni zana sem tur hi India ramah chuan Thawhṭanni zingah en theih a ni ang.

Award ceremony hi American singer Alicia Keys chuan a vawi khat nan a host dawn a, hei ngawt pawh hi hmaih phal chi a ni lo. Alicia Keys hi Grammy Award 

ṭum 10 chuang zet lo dawng tawh a ni a, a mikhual dawn lo. 

'Music Biggest Night' an tihah hian khawvel huapa zaithiam lar an fuankhawm dawn a, perform turte pawh a ṭha ber tih ngam ṭhiau an ni. 'A Star Is Born' film avanga rawn invawrh lar chho leh mek Lady Gaga chu boruak nei lian berte zinga mi a ni a, ani hian 'Shallow' a perform dawn. Hetih lai hian a perform pui tur Bradley Cooper chu a inlan thei leh dawn lo nia sawi a awm a, Lady Gaga hi engtiang chiahin nge a chet ang tih chu hriat chakawm tak a ni. 

American hmeichhe rapper lar Cardi B chu mipui chawk hlimtu tur ber a ni dawn a, a perform a hmuhnawm leh khawp ang le. British singer Dua Lipa chu mipui hmuhchak berte zinga mi a ni a, ani hi American musician St. Vincent nen an perform dawn nia sawi a awm bawk. 

Candian singer lar Shawn Mendes chu hmeichhe lamin an bawr nasat tur a ni leh dawn a, Super Bowl Halftime Show-a perform zo hlim Travis Scott chu mipui mit fukna tur pakhat a ni. Post Malone, Ricky Martin leh J Balvin ten eng lam nge an rawn hrut dawn hriat a chakawm tawh hle bawk. 

Hengho bakah hian Camila Cabello, Brandi Carlile, Dan + Shay, H.E.R., Little Big Town, Janelle Monáe, Kacey Musgrave leh Maren Morris te chu dawhsan lawn tur zingah an tel a, Red Hot Chili Peppers, Diana Ross, Arturo Sandoval leh Young Thug te pawh an la awm cheu bawk. 

American singer ropui Dolly Parton chu a tawp nan Grammy Award-ah a inlan dawn a, a tan chuan hun hlu bik a ni ngei ang. Kum 73 mi lai ni ve tawh Dolly Parton hi Miley Cyrus leh Shawn Mendes te chuan an dinpui dawn a, engtiang chiahin nge hun an hman ang tih chu mipui hmuh chak a ni. 

Dolly hi 2001 hnua a vawi khat nan Grammy Award-ah a inlan leh dawn a, Musicares Person of the Year award hlan a ni ang. A hla lar hrang hrangte chu Katy Perry, Maren Morris, Kacey Musgraves leh Little Big Town ten an sa dawn niin an tarlang bawk.

'Roar' singer Katy Perry chu mipui hmuh chak ber pakhat a ni leh dawn a, ani hian Award Ceremony-ah tlar hma a chang dawn. Kum 34 mi Katy Perry hi Lady Gaga leh Mark Ronson te nen tlar khatah an ṭhuho dawn a, Miley Cyrus leh idol, Dolly Parton te chu an bul hnaia ṭhu tur an ni. Katy Perry hi perform tur zingah a tel nia sawi a awm bawk. 

Award ceremony-ah hian kim lo lian tak a awm dawn - American singer Taylor Swift leh Arina Grande te chu an tel thei dawn lo niin an tarlang tlat.  

'Shake It Off' singer Swift hian London lamah film a chang mek niin an sawi a, hei vang hian a inlan thei dawn lo. Hetih lai hian 'Thank U, Next' hitmaker Ariana inlan loh tur chhan erawh chiang taka tarlan a awm lo a, Recording Academy nen an inkara boruak ṭha lo a awm mek vang nia sawi a awm bawk. Ariana Grande hi a tirah chuan perform tura sawi rik zingah a tel a, mahse a hla sak duh leh Grammy producer-te duh a inhmuh loh vangin a inhnukdawk leh ta niin an tarlang bawk. 

Grammy Award-ah hian American singer famta Aretha Franklin pualin hun hman a ni dawn a, Korean boy band lar BTS chu a vawi khat nan Grammy Award-ah hian an inlan dawn nin an tarlang bawk a ni.