Music video thar 'Duhaisam' nen Mami Varte a rawn come back

Nu a nih hnuah a reh deuh vang vang a, tunah erawh hla thar nen a rawn kir leh ta. Mami Varte chuan kum li hnua a music video hmasa ber 'Duhaisam' chu a peihfel ta a, Zonet Cable-ah tihchhuah a ni. 

Mami Varte hian album a buaipui mek a, chumi kar lakah chuan music video a rawn chhawp­chhuak lailawk a ni. 'Duhaisam' pawh hi a album ami tur niin, kan lo tem lawk dawn a ni. 

'Duhaisam' hi nula tlangval in­ngaih­zawnna lam hla niin, a tichhuah hun pawhin a zir hle. Mami Varte chuan, "V-Day puala tichhuah ngei hi ka duh a, a hlut dan pawh a danglam viau dawn a ni," a ti. 

February 14 hi nula leh tlang­val ten an induhna leh inhmangaihnate lantir nana an hman 'ni bik' a nih avangin a hlu hle a, chumi den­chhena Mami Varte hla thar ngai­thlak tur awm hi a man hla hle. 

Mami Varte hian mi hla phuah sa sak ringawt a thiam emaw kan lo ti a nih chuan kan ring sual hle ang. Tun ṭuma a hla thar 'Duhaisam' hi ama irawm chhuak ngat a ni a, ngaihtlak pawh a man hla hle. Tun hma pawhin ama hla phuah a lo sa fo tawh bawk. 

'Damlai par' singer hian music video hi a uluk hle a, belchhian pawh a dawl viau. Recording hi Kings & Prophets-a tih niin, video hi music video siam lama sulhnu nei ṭha tak Mawitea Hauchhum (RDS Shots) kutchhuak a ni. 

Victor Vanlalhruaia chu producer-ah hmangin, theih­tawp an chhuahdun a - music video ṭha tak mai an rawn chhawpchhuak ta a ni. 

Mami Varte hian Kings & Prophets Records Label hnuaiah album thar tichhuah tumin hma la mek a, a zai ngainatute tan chuan thu hriat nuam tak a ni ngei ang. He album-ah hian a hla phuah hrang hrang dahkhawm a tum a, a chhuah hun tur erawh sawi lawk theih a ni rih lo. 

Mami chuan, "Album buaipui hi thil hautak tak a ni a, hun pawh a duh rei. Video album phei chu ka tum ngam tawh chiah lo a, amaherawh chu ka hla phuah hrang hrang dahkhawmna album erawh tihchhuah ngei ka tum," tiin a sawi a, kumin chhunga tichhuah hman a beisei thu Vanglaini a hrilh bawk. 

Mami Varte hian kum 2007 khan music video album 'Damlai Par' a tichhuak a, Zoram dung leh vang a dengchhuak hneh hle. A album hlawhtling tak avang hian rimawi khawvelah a hming a chhher a, a music video thar pawh hian ngaihven a hlawh hle a ni. 

Mami Varte music video hi Zonet bakah Music Domain Mizoram (MDM) YouTube channel lamah pawh hmuh tura dah a ni tawh.