Box Office: The LEGO Movie 2 a inlar
February 8-a tlangzarh The LEGO Movie 2: The Second Part chuan North America Box Office-ah a inlar nghal a, sum lalut hnem ber a ni. He fantasy/science fiction film hian tun weekend chhung khan $mtd 34 zet lalutin, No.1 a hauh a ni.
The LEGO Movie 2 hi tun hnaia film chhuak thar zingah chuan boruak nei lian ber a ni mek a, sum lakluh kawngah pawh a che ṭha hle. He animation film hi American film director Mike Mitchell kutchhuak niin, Hollywood star Jason Momoa, Chris Pratt leh Australian actress Margot Robbie te chu aw thawhtu zingah an tel a ni.
Rin lawk ang ngeiin sum lakluh kawngah a che ṭha hle a, Box Office-ah rorelrtu a rawn ni nghal chat a ni. LEGO hi What Men Want leh Cold Pursuit te chuan an dawt a, an sum lakluh chu $mtd 18 leh $mtd 11-te a ni. Top 3-te hi tun hnaia chhuah vek niin, February 8 khan US-ah tlangzarh an ni. Box Office-ah hmun lailum an chang nghal vek bawk.
Fantasy/romance film What Men Want hian LEGO chiah tluk loh a nei a, Northern Ireland star Liam Neeson leh American actress Emmy Rossum te channa Cold Pursuit chu an zinga sum lalut tlem ber a ni.
Hun eng emaw chen ro lo rel tawh - The Upside leh Glass te chu top 5-ah an la in hamtang zui zel a, an sum lakluh erawh a tlahniam hret hret. Kevin Hart leh Nicole Kidman te channa The Upside hian kar liamta chhung khan $mtd 7.4 lalutin palina a hauh a, Scottish actor James McAvoy leh British-Argentine actress Anya Taylor-Joy te channa Glass ($mtd 6.2) chu pangana a ni.
The Prodigy chuan $mtd 5.8 a lalut a, Green Book, Aquaman leh Spider-Man : Into The Spider-Verse te chu sum hailut tam zual zingah an la tel cheu bawk. Hetih lai hian tun thla tira tichhuah Miss Bala chuan $mtd 2.7 lalutin, hmawrbawktuah a ṭang a ni.
Box Office Top 10
1. The LEGO Movie 2: The Second Part - $mtd 34
2. What Men Want - $mtd 18
3. Cold Pursuit - $mtd 11
4. The Upside - $mtd 7.4
5. Glass - $mtd 6.2
6. The Prodigy - $mtd 5.8
7. Green Book - $mtd 3.4
8. Aquaman - $mtd 3.2
9. Spider-Man : Into The Spider-Verse - $mtd 3
10. Miss Bala - $mtd 2.7