Ṭum khata Grammy Award la hnem ber Michael Jackson & Santana

Grammy Award hi zaithiamte hlawhtlinna tehna pawimawh ber pakhat a nih miau avangin mipuiin an ngaihven a, titi leng vak pawh a tam ṭhin hle. Kuminah pawh award sem zawh hnu thlengin a boruak a la lian a, he chawimawina lo dawng hnem tawhte thlengin lam rik an ni. 

American singer ropui Michael Jackson chuan ṭum khatah Grammy Award pariat zet a lo dawng tawh a, hetiang zat bawk hi Latin rock band Santana te chuan an lo dawng tawh a ni. Beyoncé, Adele leh Bruno Mars te chu he chawimawina dawng hnem zual zingah hian an lang ve bawk. 

Music khawvela hming dai tawh ngai lo tur Michael Jackson hian sulhnu ropui tak tak a hnutchhiah a, Grammy Award-a a sulhnu chu tun thlenga khawvelin a sawi ban theih loh a ni. 

'Billie Jean' singer hian kum 1984 khan ṭum khatah Grammy Award pariat zet a lo hawn tawh a, mimala la hnem ber a ni. Award a lak zingah hian - Rrecord of The Year, Album of the Year leh Best Male Pop Vocal Performance te a tel a, mi bik a nih zia a lang chiang hle. 

A record duhawm tak hi tun thlengin khum thei an la awm lo a, mimala amah hnaih bertu Beyonce chuan ṭum khatah award paruk a la a ni. 

Kum 1966-a indin an ni a, an daih rei hle. An band an din aṭanga kum 30-ah pawh music huanga chawimawina sang dawng thei an ni. Santana hian 2000 khan ṭum khatah Grammy Award pariat zet an la a, chung zingah chuan award ngaihlut tak tak - Record of the Year, Album of the Year leh Best Rock Performance te pawh a tel a ni. 

Music khawvela hriat hlawh tak tak - Adele, Beyonce, Quincy Jones leh Brun Mars te chu ṭum khata Grammy Award paruk lo hui tawh te an ni a, an record hi a namai lo hle. 

American record producer Quincy Jones chuan 1991 khan ṭum khatah award paruk zet a lo la tawh a, Eric Clapton chuan 1993 khan a record hi a rawn nih rual. American singer Beyonce chuan kum 2010 khan a ropui vang lai tawngin award paruk zet a lo hawn ve tawh bawk a, British singer Adele chuan 2012 khan heti zat bawk hi a lo dawng tawh bawk. Beyonce leh Adele te hian ṭum khata award panga lak ṭum an nei leh tawh bawk. 

Nikum khan Bruno Mars chuan a album hlawhtling tak '24K Magic' hmangin Grammy Award paruk zet a lo hui tawh bawk a, chung zingah chuan - Album of the Year, Record of the Year leh Song of the Year te pawh a tel a ni. 

Amy Winehouse, Norah Jones, Alicia Keys leh Lauryn Hill te chuan ṭum khatah Grammy Award panga an lo chawi tawh a, Paul Simon chuan 1971 khan he record hi a lo siam tawh bawk. An zingah hian Alicia Keys leh Amy Winehouse te chu record nei ṭha an ni a, Grammy Award 10 chuang an dawng tawh a ni. 

American singer Kacey Musgraves leh Taylor Swift te chuan ṭum khatah award pali an lo humhaw ve tawh bawk a, Sam Smith  pawh a bang bik lo. English singer Sam Smith hian 2015 khan - Record of the Year, Song of the Year, Best New Artist leh Best Pop Vocal Album te a dawng a ni. 

Taylor Swift hian 2010 khan 'Fearless' album hmangin award pali a lo la tawh bawk a, country music huangah a hlawhtling hle a ni. Kumin Grammy Award-a mimal langsar ber tih ngam chu Kacey Musgraves a ni a, award la hnem ber pawh a ni. Kacey Musgraves hian 'Golden Hour' album hlawhtlinpuiin -  Album of the Year a dawng a, Best Country Album atan thlan a ni bawk.