‘The School for Good and Evil’-ah Charlize Theron

Netflix film thar tur ‘The School for Good and Evil’-a chang tur zingah Charlize Theron leh Kerry Washington-te hming chu ziah luh belh a ni.

Soman Chainani fantasy novel ‘The School for Good and Evil’ tih tho behchhanin an siam dawn a, ṭhian inkawmngeih tak Sophie leh Agatha-te School for Good and Evil-a 'kidnap' an nih dan chanchin vel a ni dawn. Washington hi Professor Dovey lemah a chang dawn a, Theron hi Lady Lesso lemah a chang thung ang.

Charlize Theron leh Kerry Washington-te a channa tur film siamtu tur Feig chuan Zirtawpni khan a twitter-ah film star lar tak pahnihin a film-a an chan dawn chungchang hi a tarlang a ni. Feig hian lemchan lamah sulhnu ṭha tak tak a hnutchhiah tawh, chung zingah chuan Freaks and Geeks, Bridesmaids, A Simple Favor leh The Heat-te pawh kha a tel.

‘The School for Good and Evil’-ah hian Sophia Anne Caruso leh Sofia Wylie-te an chang dawn tih a hmain puan a lo ni tawh a, tunah hian Northern Ireland-a Belfast Harbour Studios-ah an chang ṭan der tawh bawk.