Andrew K.Lalchhandama Music video hmasa ber 'Zalenna Dar'

Mizo Idol aṭanga Zoram mipuiin kan hmelhriat, Andrew K.Lalchhandama chuan a music video hmasa ber chu a peih fel ta. Andrew-a hla thar hi 'Zalenna Dar' tih a ni a, zanin hian Zonet-ah tichhuah a ni ang. 

Darlawn tlangval Andrew-a hian a music video hmasa ber hi, February, 2004-a boral a pa K.Vanlaltluanga tan a hlan a ni. 

Andrew hi Mizo Idol Season 6-ah khan a aw mawi dangdai tak avangin hriat a hlawh a, a zai ngainatu pawh an tam hle. Idol intihsiak laia a hla thul khung 'Zalenna Dar' ngei mai chu music video siamin a rawn chhawpchhuak ta a, ngaithlak pawh a chakawm tawh hle a ni. 

He hla hi Davidate Unau (group zai)-ten hnehsawh takin an lo sa tawh a, an zinga mi Malsawmdawngliani Chhangte phuah a ni. 'Zalenna Dar' hi van­ram ngaihna lam hla niin, Pathian fakna hla ṭha tak a ni bawk. 

'Zo-James Blunt' an tih mai Andrew K.Lalchhandama hian aw danglam tak a nei a, hei hi amah pawhin a hmang thiam hle. A music video pawh hi eng­tiang chiaha belhchian dawl nge tih hriat a chakawm tawh hle -zaninah a hriat dawn. 

Music track hi Kima Chhangte kutchhuak niin, recordings hi Homefree Music Records-ah a tih a ni thung. Wardrobe hi Achhani Innovatives Dresses a ni a, video hi Albert Ralte kutchhuak a ni bawk.

Andrew hian love song sa tura ngenna pawh a dawng nual a, amaherawhchu Pathian hla bak sak a tum hauh lo. Mizo Idol-ah pawh khan audition round aṭanga judge ten love song sa tel tura an duh thu an sawi, aw 'special' tak nei a ni a, heti chung hian lengzem hla sak tumna a nei lo. 

Andrew chuan, "Pathian-in aw ṭha tak min pe a, hei hi Amah fak nan ka duh a ni. Pathian faka zai hi ka duh ber chu a ni," tiin a sawi. A music video hmasa ber a puitlin theih nanan puitu zawng zawngte chungah lawmthu a sawi bawk. 

Andrew K.Lalchhandama music video hmasa ber 'Zalenna Dar' hi Zonet bakah, MDM You­Tube channel-ah tichhuah a ni ang.