India Box Office Uri : The Surgical Strike a hit zui zel

Tun hnaiah Bollywood film chhuak thar awm nual mah se, Vicky Kaushal channa Uri : The Surgical Strike aia hit a awm chuang lo. January 11-a tlangzarh Uri hian vaibelchhe 250 zet a lalut tawh a, India Box Office-ah ro a rel chhunzawm zel. 

Tun hnaiah Jammu & Kash­mir-a India sipai ten beih an tawk leh a, mi 40 chuang zet an thi. He thil thleng hian dem a hlawh a, India mipui rilru pawh a tina tak zet. 

Hetih lai hian he thil thleng hian Uri : The Surgical Strike hralhchhuah kawngah a ṭha zawngin nghawng a neih ngei a rinawm a, entu an ngah phah a rinawm. Tun weekend-ah hian engtiang chiahin nge nghawng a neih dawn chu a hriat dawn a, India mipui tluklehdingawn telin J&K lam an hawi lai a nih avangin sum lakluh kawngah a chet ṭhat rin a ni. 

Bollywood star Vicky Kau­shal leh Yami Gautam te channa Uri hian tun kar tir lam kha chuan vbch 214.56 vel a lalut a, a sum lakluh hi a la pung chak hle a ni. Trade expert Taran Adarsh chuan Baahubali 2: The Conclusion pawh a khum theih hial a rin thu a sawi. 

Taran Adarsh chuan February 14-a J&K-a thil thleng rapthlak tak chuan nghawng a neih ngei a rin thu a sawi bawk a, India mipuiin helai hmuna thil thleng ṭhin hi hriatchian an duh a ni, a ti. Uri pawh hi 2016 September 18-a Pakistan firfiakte'n Jammu and Kashmir-a Indian army headquarters an beih behchhana siam a nih avangin ngaihven a hlawh zual dawn niin a sawi bawk. 

Uri-a helte phawikhawihna-ah khan India sipai 18 zet an thi a, India pawhin na taka chhangletin Surgical Strike hial a nei a ni. Tun ṭumah thil thleng pawh hian Bollywood film siamtute beng a verh hle a rinawm a, nakin lawkah chuan film-in kan la hmu leh mai thei a ni. 

Hetih lai hian 'Uri' star Mohit Raina chuan Central Reserve Police Force (CRPF) ten beih an tawk leh ta chu pawi a tih thu a lo sawi ve mek bawk. 

Box Office-ah hian Uri : The Surgical Strike bakah hian January thla-a tichhuah tho The Accidental Prime Minister chu a la che ṭha viau bawk.