Google-in data center din nan $tld 13 ruahman!

Google chuan US hmun hrang hranga data center dinna turin US dollar tluklehdingawn 13 zet a ruahman a, hei hi kumina atan chauh a la ni zui! Nikum khan data center din nan hian $tld 9 zet an lo hmang tawh bawk a ni. 

Company CEO Sundar Pichai chuan hemi chungchang hi tun hnai khan a puang a, an hmachhawp hrang hrangte a tarlang bawk. Sundar Pichai chuan data center hi - Nevada, Texas, Oklahoma, Nebraska, Ohio, South Carolina leh Virginia-ah te din a ni dawn a, hemi atan hian hnathawktu mi 10,000 vel an mamawh belh dawn tih a sawi. Data center bakah hian US hmun hrang hrangah office hawn belh tumin hma an la mek tih a sawi bawk. 

Google hian huang zauh zel turin hma an la mek a, a elpui Amazon leh Microsoft te an ṭhan chak em avangin inthlahdah thei an ni lo. Tunah hian US state 21-ah an inzar pharh mek a, kumin chhungin state pathum - Nevada, Ohio leh Nebraska-ah te inbun leh a tum a ni. 

Technology company zingah Apple chu hlu berin, an hlutna hi $tld 182 vela chhut a ni. Apple hi Software company Hewlett-Packard chuan dawtin, IBM, Amazon leh Microsoft te an intlar a, Google chu parukna a ni. Google company hlutna hi $tld 33.6 vel niin an tarlang.