Box Office Toy Story 4 bawkin ro a rel

Walt Disney Pictures tana  Pixar Animation Studios in an produce, animated Comedy film Toy Story 4 chuan Box Office-ah ro a rel chhunzawm.

Toy Story hian chart hmasa lamah khan Men In Black International nekchhuakin, ro a rel tawh a, tun ṭumah pawh hian nek chhuak zo an la awm lo a ni. Josh Cooley film hian lawm a hlawh chhunzawm hle a, Toy Story hmasa ho hlawhtlinna en chuan thil mak erawh a ni lo. 

He animation film-ah hian aw thawhtu pawh an hraw hle a, Tom Hanks, Tim Allen, Annie Potts, Tony Hale leh Keanu Reeves tihte an ni nawk hlawm a, nek chhuak thei an la awm lo pawh hi a awm ve reng a ni, pawh ti ila kan sawi sual tam lo ang.

Box Office-ah hmel thar pahnih hmuh tur a awm a, an dinhmun erawh a ṭha hle thung. Horror film Annabelle Comes Home chuan chart-ah pahnihna a rawn hauh nghal a, Zirtawpni maia tlangzarh kha ni mah se a dinhmun a rawn sang nghal hle.

2017-a tihchhuah  Annabelle: Creation chhunzawmna Anna­belle Comes Home hian en a hlawh nghal hle a, kar tawpah khan theatre 3,613-ah chhuah niin a sum hmuhchhuah pawh a theuneu lo nghal hle a ni. Pathumna dinhmun luahtu hi film thar a ni bawk a, romantic comedy film Yesterday chu beisei aiin a rawn che ṭha nghal hle. Ed Sheeran hmel hmuh tur a awm hian en a tichakawm zual a, music lam kaihhnawih film a nih bawk avang hian rimawi lama tui tan pawh hmuhnawm tak tur a ni.

Chart hmasaa pathumna Aladdin chu palina a la ni a, The Secret Life of Pets 2 chu panganaah a awm ve bawk. Beisei aia che ṭha lo Men in Black International pawh parukna a la ni ve bawk. Avengers: Endgame chuan Box Office top 10 a la chhuahsan hleithei lo a, pasarihnaah a la awm. Entu an tlahniam hleithei lo.

Child's Play (2019) leh Rocket­­man-te chu pariatna leh pakuanaah an awm a, action film ropui John Wick: Chapter 3 - Parabellum pawh top 10-ah a la inhamtang ve bawk a ni.

1.    Toy Story 4    $mtd 59

2.    Annabelle Comes Home    $mtd 20

3.    Yesterday    $mtd 17

4.    Aladdin    $mtd 10

5.    The Secret Life of Pets 2    $mtd 7.3

6.    Men in Black International    $mtd 6.6

7.    Avengers: End Game    $mtd 6.1

8.    Child's Play    $mtd 4.4

9.    Rocketman    $mtd 3.9

10.    John Wick: Chapter 3 - Parabellum    $mtd 3.2