Sony walkman-in kum 40 a tling

Portable Music Industry ṭanchhuaktua sawi Sony Walkman chuan Thawhṭanni khan kum 40 a tling.

Sony hian July 1, 1979 khan an Walkman hmasa ber TPS-L2 chu Japan-ah an tlangzarh a, hemi hma hian music player hmun hrang hranga awlsam taka kalpui theih a la awm ngai lo. Sony Walkman hmasa ber hi audiocassette player a ni a, headphone hmanga music ngaihthlak theih niin, duh duhnaah awlsam takin a kalsawn pui thei a ni. Tuna portable music player awm zawng zawng hi Sony Walkman hnungzuitu vek an ni ti ila a dik awm e.

Sony-in bul an ṭan hnuah hian double audiojacks-te, lehlam lehlam-a cassette play theihna leh sound record theihna walkman-te pawh siamchhuah leh a ni. Tunlai digital music player ho a chhuah hma phei kha chuan walkman hi an uar hle a, kum zabi 21-a MP3 player leh ipod tih vel siamchhuah a nih hnuah khan walkman hi hluihlawn a ni ta chauh.

Heti chung hian Sony hian an walkman hi an la zawrhchhuah chhunzawm zel tho. Sony hi CD player siamchhuaktu hmasa an ni leh bawk a, 1984-ah daih tawh khan CD Player D-50 an lo siamchhuak tawh a ni. Sony Corp chuan Thawhṭanni aṭang khan an walkman kum 40 tlin lawmna atan hian thla hnih awh tur a lawmna Tokyo-ah an hmang ṭan a, portable music player lar tak tak an phochhuak.