Zaira Wasim-i'n lemchan chawlhsan

Bollywood star Zaira Wasim chuan lemchan a chawlhsan thu a sawi. 

Kum 18 mi chauh ni chunga lemchan chawlhsan leh nghal mai a tum hian Zaira Wasim ngaisangtute a ṭhawng hle a, social media lamah a thutlukna thlawp leh sawiselna lam pawh a tam hle. Wasim chuan Bollywood a chawlhsan chhan a sawiah, film indus­try chuan a nun chhungril hahdamna leh Allah nena an inkar thlengin a tichhia tih a sawi. 

Kashmir-a piang, Wasim hi kum 2016-a tihchhuah, Dangal film-ah Indian sportwoman Geeta Phogat naupan lai lema a chan aṭangin hriat a hlawh chho a ni. Kum 2017 khan Secret Superstar-ah a chang bawk. A film chan avang hian chawimawina pawh a dawng nual tawh a, heng zingah hian Filmfare Award leh National Film Award pawh a tel. Kum 2017 khan India President Ram Nath Kovind kut aṭangin National Child Award for Exceptional Achievement a dawng bawk. 

Wasim channa, The Sky is Pink chu tihchhuah ala ni lo a, hei hi film lama a inhnamhnawihna hnuhnung ber tur a ni dawn ta a ni. He film-ah hian Priyanka Chopra Jonas leh Farhan Akhtar-te pawh an chang a ni. Shooting hi March thla khan an zo tawh.