'Game Of Thrones' prequel series tunthlaah chang ṭan dawn
Game Of Thrones prequel series tur, working title-a 'Bloodmoon' tih hman chu tun thla laihawlah hian Italy-ah film ṭan a ni dawn tih HN Entertainment chuan an tarlang.
Shooting hi July 10 hnu lamah neih ṭan a ni dawn a, Italy tuipui kam velah an film ṭan dawn niawm tak a ni. GoT prequel series hi eng lam nge a nih dawn tih engmah thuchiang sawilan la ni lo mah se GoT hma kum 5000-a thil thleng vel a ni dawn tih erawh hriat a ni thung.
GoT ziaktu George RR Martin chuan GoT prequel-ah hian King's Landing, Iron Throne, Targaryens tih vel a awm dawn lo tih a sawi. Martin hi 'Bloodmoon'-ah hian executive producer leh co-creator a ni dawn tih tarlan a ni tawh bawk.
He series-ah hian Westeros' history hmuh tur a awm nual dawn tih erawh hriat a ni a, white walker lo chhuah dan-te pawh a lang dawn ni awm tak a ni. GoT fan-te tan chuan thu lawmawm tak a ni ngei ang a, Naomi Watts, Josh Whitehouse, Miranda Richardson leh Jamie Campbell Bower-te chu inlan tur zingah an tel hmel hle bawk.