Song Joong-Ki : A film thar tur chang ṭan dawn

Korean top star, Song Joong-ki chu a nupui hlui, Song Hye-kyo nena an inṭhenna tihfelna tur buaipui mek a ni chungin a hna lamah a rilru sawrbing a tum a, a film thar tur science-fiction film, Victory pawh July 3 aṭang khan an chang ṭan leh tawh. He film hi kum 2020 a tihchhuah tum a ni. 

Victory hi kum thum chhunga Song-a'n film a chan lehna hmasa ber tur a ni a, South Korea space-themed high-budget science fiction movie hmasa ber tur a ni bawk. He sci-fi film budget hi US dollar maktaduai 17 a tling a ni. Song hian spaceship, Victory-a pilot Tae-Ho lem a chang dawn a, Yoo Hae-Jin, Kim Tae-Ri leh Jin Seon-Kyu-te pawh an inlan dawn. 

Song nupui ṭhen tak, Song Hye-kyo pawh an inṭhen hnua mipui hmaa a inlan vawi khatna turin China-a Korean beauty brand Sulwhasoo promotional event-ah a inlan dawn bawk. Song Joong-ki leh Song Hye-kyo-te hian an thil neih, USD maktaduai 86.5 hu chu an insem dawn a, July thla tawp lam hian court lamah tihfel hman besei a ni.