NASA-in Thlaah mihring lawn tir leh tum

National Aeronau­tics and Space Adminis­tration (NASA) chuan kum 2024-ah chuan astronaut-te thlaah lawn tir leh a tum a, hemi atan hian hma an la mek.

Thlaa mihring lawn­tir lehna tur Space Launch System (SLS) an siam mek a, Thawhlehni-ah pawh khan SLS hi an test tawh nghe nghe. Program mana­ger Kirasich chuan Thawhlehni-a test an neih­ah chuan hma­sawn­na nasa tak an nei tih a sawi.

NASA hian thlaa mi­­­hring lawn tirna tur Orion Capsule an design-a hman tur  full-stress launch abort test Thawhlehni khan an nei. Capsule hi Cape Canaveral Air Force Station-ah test a ni a, kah­chhuah a nih aṭanga minute khat vel lekah abort motor hi a inkap chhuak a, capsule hi km. 10 vel zet a vawrh thei a ni. Hemi hnu hian km. thum vel a chung zawnga a inkah chhuah leh hnuah Atlantic-ah a tla ta a ni.

Hei hi ruahman sa ang veka kal a nih thu NASA official-te chuan an sawi a, test hi minute thum velah an zo fel. Thawhlehni-a en­chhin­na an neih hi Orion capsule an test ṭum hnihna a ni tawh a, 2010-ah khan New Mexico-ah test hmasa zawk an lo nei tawh bawk.