NETFLIX Army of the Dead May 21-ah

Zack Snyder-a Netflix zombie heist film Army of the Dead chu May 21-ah tlangzarh a ni dawn tih Snyder chuan social media kaltlangin a puang.

Snyder hian twitter-ah Army of the Dead poster hi tarlangin a captionah 'Survivors take all' tih a hmang a, May 21-ah Netflix-ah a en theih dawn tih a tarlang tel bawk. 

Army of the Dead-ah hian Snyder hi director a nih bakah story writer, cinematographer, co-screenwriter, leh producer a ni tel bawk. Shay Hatten (John Wick: Chapter 3 – Parabellum) leh Joby Harold (King Arthur: Legend of the Sword) -te nen he film siamnaah hian an thawk ho a ni. 

He film siamna atan hian $mtd 70-90 vel sen a ni tih Netflix chuan an lo tarlang tawh a, film star lar tak tak- Dave Bautista, Ella Purnell, Raúl Castillo, Omari Hardwick, Tig Notaro, Nora Arnezeder, Matthias Schweighöfer, Samantha Win leh Theo Rossi-te an chang.

Netflix hian Army of the Dead franchise tur hi an ruahman der tawh bawk. Nikum September thla khan a prequel film an siam dawn tih an lo puang tawh a,   anime prequel series Army of the Dead: Lost Vegas siam an tum tih an tarlang tawh bawk.

July 15, 2019 aṭang khan an chang ṭan tawh a,  Los Angeles, California, leh Albuquerque, New Mexico-ahte an chang a, Atlantic Club Casino Hotel, Atlantic City, New Jersey-ah pawh an chang bawk a ni.

Zack Snyder hi tunlaia director lar ber tih loh rual a ni lo. March 18-a tlangzarh a tum Justice League chuan tunhnaiah thawm a nei ring hle a, thuthar a awm hlekin entertainment khawvelin an bawh luai luai a ni ber, chutiang karah chuan tunah Army of the Dead a rawn ri leh bawk nen, film industry-ah chuan Snyder aia thawm nei ring an tam rih lo hle.