Puipuia hla thar a hnai

Mizo Idol aṭanga Zoram mipuiten a zai kan ngainat em em, Thawhlehnaniropuia (Puipuia) chuan hla thar a nei leh dawn a, music video pawh hmuh tur a awm thuai dawn e.

Puipuia hla thar tur hi 'I tan ka hlan e' tih a ni a, ama phuah ngei a nih avang hian a hluin ngaihthlak a chakawm tawh hle a ni. 'I tan ka hlan e' tih hla music hi Kima Chhangte siamsak a ni a, recording pawh hi Kima kutchhuak tho a ni bawk. A hla thar tihchhuah hun tur ni tak hi hriat la ni lo mah se MDM YouTube channel lamah leh Zonet lamah kan hmu thei thuai dawn tih Puipuia chuan Vanglaini a hrilh.

Music Video hi Te-a chhakchhuak (Te-a Video Production) kutchhuak a ni bawk a, hmuh a nuam leh hle turah ngai ang. Hrangbana College-a kal mek Tlangvaltea hla thar hi a thu a ṭha hle a, mihringte hian kan duh danin kan nunte lo hmang fo ṭhin mah ila Pathian tana inhlan thar lehna hun leh nun kan neih a ṭulzia tarlanna hla ṭha tak a ni.