Box Office Spider-man : Far From Home a ropui

Kartawp Box Office-ah rorel­tu thar an awm a, Toy Story 4 chuan kar hnih chhung zet ro a rel hnuah ngam loh a tawng a, kar hmasaa tlangzarh Spider-man : Far From Home a ngam lo a ni. Spider-man hian sum pawh a lalut hnem hem hem hle a,  Marvel Cinematic Universe rorelna a rawn chhunzawm leh a ni.

Spider-Man: Homecoming (2017) chhunzawmna Spider-Man: Far From Home hi Avengers : Endgame hnua thil thleng anga chan a ni a, hei vang hian nghakhleltu pawh an tam reng a ni. 

MCU film 23-na a ni tawh a, MCU film zawng zawng hi a hlawhtling em em vek ti ila kan sawisual tam lo ang. Spider-Man hi Sony hnuaia awm mah ni se  Columbia Pictures leh Marvel Studios-te chu co-producer an ni a, Kevin Feige leh Amy Pascal-te produce niin, Jon Watts-a direct a ni thung.

Minute 129-a thui a ni a, a siamna atana an budget chu USD maktaduai 160 zet a ni. Tom Holland leh Zendaya-te channa filmah hian Spider-Man comic chhiar ṭhinte chuan an hriat em em tur Quentin Beck / Mysterio lemah Jake Gyllenhaal chu a chang a, Samuel L. Jackson pawh Nick Fury lemah a chang leh bawk.

Kar tawp Box Office-ah khan USD 92,579,212 zet a hailut hman a, a dawttu chiah Toy Story 4 hian USD 33,860,355 a lalut thung a, an inthlauhna hi a tam hle a ni. Kar hmasaa pathumnaa awm Yesterday chuan a dinhmun ngai a luah a, kar hmasa lama pahnihna dinhmun luahtu horror film Annabelle Comes Home chu palina a ni thung.

Aladdin chu sum lalut tam pangana a la ni phak a, parukna chu film thar Midsommar chu a ni. Pasarihna leh pariatnaah hian The Secret Life of Pets 2 leh Men in Black International-te an awm. Avengers: Endgame chu pakuanaah a la awm a, Endgame hi a 'End' hleithei dawn lo a nih hmel. Box Office top 10 luahlum tu ber a ni hial awm e. Elton John chanchin chan chhuahna film Rocketman chuan top 10 hi a khar a ni.