Republic Veng Kohhran Zaipawlin music video tichhuak

Republic Veng Kohhran Zaipawl chuan music video 'Engkim ka siam thar ang' chu mipui hmuh theih turin nizan khan Republic Veng Branch KṬP channel-ah an pho chhuak. Thawhṭanni zan inkhawmah pastor C Thangṭhuama, bialtu pastor-in music video hi Pathian hnenah a hlan.

'Engkim ka siam thar ang' tih hla hi Mary McDonald-i'n Isaia 43:1-19 behchhana a phuah, 'I will make all things new' tih hla, conductor K. Lalrambuatsaiha'n (Puia) a lehlin a ni a, tonic solfa-in a dah rem nghal. Nikum kum tawp khan voice recording leh video shooting zawh fel a ni a. Voice recording hi Kings & Prophets Records kutchhuak a ni a, video hi RDS Shots siam a ni thung. Music Track hi Muanpuia, Chanmari West-in a siam a ni.

Republic Veng Kohhran Zaipawl conductor Puia chuan, "Mizo ṭhalaite zingah Pathian pawh hnaih ṭha ngam lo khawpa beidawng an tam a, chung zingah chuan mahni nunna hial la duhte pawh an awm. He hla hi Pathianin a mite a thlamuanna thu a ni a, nun beidawngte tan beiseina thar siamsaktu lo ni sela, a ngaithlatu apiangten Pathian thlamuanna duhawm tak lo chang ngei rawh se," tiin Vanglaini a hrilh.