Grammy winner Daft Punk-in chawlh an puang ta

French electronic music duo, dance music mi tam tak tihhmuhtu Daft Punk chuan an indin aṭanga kum 28 a liam hnuah retire thu an puang ta. Dance music fan-te tan chuan channa ropui a ni ngei ang.

Daft Punk hian Thawhṭanni khan video 'Epilogue' hmangin an kawngpeng ṭhuam zawh tur chu a dang tawh tih hi an puang. Thomas Bangalter leh Guy-Manuel de Homem-Christo-te chu an larpui an robot thuama inthuamin thlalerah an inthlah a ni. Minute nga vel lai chu rimawi ngaihthlak tur a awm lo a, a tawp lamah 1993-2021 tih hmuh tur a awm deuh tawp.

YouTube-a an video dah comment-tu an tam a, an uina thu ngaihnawm tak tak chhiar tur a tam hle. Electronic dance music-ah chuan anni pahnih aia legend tia sawi phu an awm chuang awm lo e. Daft Punk hi kum 1993 khan an indin a, One More Time, Da Funk leh Around The World hmangtein rimawi khawvel an deng chhuak a ni.

An album hmasa ber Homework phei chu dance music-ah chuan mel lung pawimawh taka ngaih a ni a, kum 2013-a an retro-disco single tihchhuah, Get Lucky, Pharrell Williams leh Nile Rodgers-te an thawhpuina phei chu lar tak a ni. He hla awmna album Random Access Memories phei chu kum 2014 khan Grammy-ah album of the year-ah thlan a ni hial.

Mahse, hemi hnu hian Daft Punk hi an reh zui angreng hle. The Weeknd chu hla pahnihah an thawhpui leh a, mahse chuti chung chuan boruak lian tham an nei zui meuh lo.

Studio album pali an tichhuak hman a, kum 2010-a tlangzarh Tron: Legacy soundtrack kha an kut chhuak a ni bawk. Rolling Stone-in an kawmnaah de Homem-Christo chuan performer kan ni lo a, model pawh kan ni lo- kan hmel hi an hmuh chuan miin min lawm lo ang tiin a lo sawi tawh a, mahse robot erawh mipui tana thil lawmawm tak a ni, a ti thung.

Khawvel huapa musician lar tak ni mah se an robot headgear nen lo hi chuan hmuh an ni ngai meuh lo. Daft Punk inṭhen tur hi mi lar tak takin an ui hle. Pharell Williams chuan social media-ah a uizia lantirna turin 'Forever Legends' tih a post. Producer Erol Alkan chuan Thomas leh Guy-Man-te chu a zah thu ziak langin Duth DJ lar Don Diablo pawhin a naupan lai aṭang tawha amah 'inspire' tu an nih thu ziakin a mangṭha ve bawk.