Box Office-ah The Croods: A New Age bawk a chungnung leh
North America Box Office-ah chuan The Croods: A New Age bawkin sum a lalut tam leh ber.
The Croods: A New Age hi nikum November 25-a tlangzarh daih tawh kha a ni a, hun eng emaw chen chart-a roreltu a nih hnuah nek chhuahin a awm a, top 5 chinah a kual a kual hnuah kar hmasa aṭang khan roreltuah a rawn ṭang leh a ni.
Kar tawp liam taah khan theatre 1,913 aṭangin $1,718,455 a lalut leh a, ani aia sum lalut tam an awm lo. North America box office aṭanga a sum lakluh tawh zawng zawng chu $50,872,660 a ni tawh a, khawvel pumah $154,095,660 a hmu chhuak tawh.
The Little Things chu pahnihna niin theatre 2,061 aṭangin $1,200,000 a lalut bawk a, Judas and the Black Messiah chu pathumna a ni thung.
Nomadland a rawn lang ve ta
Tunhnaia film festival hrang hranga che ṭha tak, fak hlawh tak Nomadland chu Zirtawpni liam ta khan US-ah tlangzarh a ni ve ta a, theatre 1,175-ah pe chhuakin $503,000 a lalut a, pasarihna a ni. Nomadland hi Oscar award la ngei tura mi tam takin an ngaih a ni a, China lamah pawh tlangzarh phalna an nei tawh niin The Hollywood Reporter chuan a tarlang.
Nomadland bakah hian chart-a film lang thar pakhat dang a awm a, chu chu Blithe Spirit niin hei pawh hi film thar a ni chiah lo a, nikum October thlaah khan Mill Valley Film Festival-ah premier a lo ni daih tawh. British comedy film a ni a, North America Box Office-ah kar tawp liam ta khan theatre 239-ah pe chhuakin $88,559 a lalut a ni.