DJ Marshmello-a'n Pune-ah show a nei India sipai martar-te zahna a hlan
Electronic Dance Music (EDM) khawvela hriat hlawh berte zinga mi, DJ Marshmello chu Pathianni zan khan Pune-a Vh1 Supersonic 2019 music festival-ah a perform a, mipuiin an hlut hle. DJ Marshmello hian show a ṭan hmain tun hnaia hel pawikhawihna avanga thi India sipai 40 te sunna hun minute hnih chhung a hmang a, stage-ah India flag a pawt pharh bawk.
American electronic music producer Marshmello chuan hel kuta thi sipai martar te chuan zah an phu tih sawiin, thi chhungte pawh a tawrhpui thu a sawi. Show neih zawh hnu hian Pulwama terror attack-a nunna chante chu zahna a hlan thu leh vanduaina thleng chu pawi a tih thu Twitter kaltlangin a tarlang leh bawk.
DJ Marshmello hian tun hnai khan - Delhi, Pune leh Hyderabad-ah te show a nei a, chhimtu a ṭhahnem thei hle. Kum 26 mi Marshmello chuan, "India-ah hian
ṭum thum ka lo kalna a ni ta a, nuam ka ti takzet a ni. He hmun hi ka tan a 'special' em em a, fans ten min ṭawimawm ṭha thei hle bawk," tiin, India nuam a tih thu a sawi a, Indian singer Pritam Chakraborty chu thawhpui nuam a tih thu a sawi bawk.
DJ Marshmello leh Pritam te hian February 14 khan 'Biba' an tichhuak a, Shirley Setia leh Shah Rukh Khan ten an pui bawk. He music video hi a hit rem rem hle a, viewer maktaduai kua chuang zetin an awm leh der tawh.
Vh1 Supersonic 2019 music festival hi February 16&17 khan neih a ni a, DJ Marshmello bakah hian Jaden Smith, Bonobo, Anik Khan, Prateek Kuhad leh Rudimental te pawh an inlan a ni.