Ed-Sheeran-a'n Cherry Seaborn nen an innei tih sawichiang

An inneih chungchang hi khawthlang media-te chuan an sawina rei tawh mah se, anmahni lamin thu leh hla hun eng emaw chen an neih loh hnuah, British singer Ed Sheeran chuan Cherry Seaborn nen an inneih thu hi tun hnai khan interview-naah a sawi chhuak.

YouTube show Char­lamagne Tha God-a inter­view-naah hun rei tak a lo kawp tawh Seaborn nen an inneih thu hi a sawi chhuak a ni. He Show-ah hian kum 28 mi Sheeran hi a hla 'Remember the Name' chungchang zawh a ni a, hemi a chhannaah hian a nupui chu lipstick tel loa a lan mawi zawk thu a sawi bawk a ni. 

Ed Sheeran leh Cherry Seaborn-te inneih chungchang hi kumin February thla aṭang daih tawh khan sawilan a ni tawh a, a ṭhian hnai tak pakhat chuan nikum Krismas hma deuh khan an innei tawh tih a lo sawi tawh.Sheeran leh Cherry hi kum eng emaw zat an inzui tawh a, nikum January thlaah khan Instagram-ah an inhual thu an puang.

Ed Sheeran hian a studio album palina tur - No 6 Collaborations Project chu kar liam ta Zirtawpni khan a tlangzarh bawk a, Asylum Records leh Atlantic Records-ten an tlangzarh. No 6 Collaborations Project hi a hlawhtling leh hle tura ngaih a ni.