Huawei 5G smartphone hmasa ber July 26-ah
China telecom giant Huawei chuan July 26 hian a 5G smartphone hmasa ber tlangzarh turin ruahmanna a siam.
US nen technology leh insumdawn tawnna chungchangah innghirnghona nei mek mah se Huawei chuan a 5G smartphone hmasa ber tur tlangzarh tur hian ruahmanna a siam tho a, a phone hming tur pawh Huawei Mate 20 X a nih tur thu a tarlang.
Huawei official-te chuan an 5G smartphone hmasa ber tur hi an headquarters Shenzhen-ah an tlangzarh dawn tih an sawi a ni. China hian thla hmasa khan an ram chhunga company liante chu green signal pein 5G service tichhuak ṭan tawh turin a ti a ni. Hemi vangte pawh hi a ni mai thei Huawei chuan tunthla chhung ngeia 5G phone a tihchhuah tur thu hi a puang nghal.
Huawei Mate 20 X hian anmahni chip set bik Kirin a hmang dawn a, 5G technology hmang hian 4G LTE networks aia a let 10 aṭanga 100 vel thlengin download speed pawh a chak zawk dawn nia sawi a ni bawk.