TIME Magazine-in Internet-a mi hneh thei zual 25 thlang chhuak
TIME Magazine chuan a tih fo ṭhin angin Internet-a mi hneh thei zual (most influential people on the Internet) 25 a thlang chhuak leh a, US President Donald Trump, Ariana Grande leh Korean boy band BTS-te pawh an tel.
TIME hian internet-a news an ngah dante leh social media-a huhang an neih dante chhuizuiin, heng mi 25-te hi an thlang chhuak a ni. Mimal ang kherin an thlang ziah lem lo a, tun ṭumah pawh hian Hong Kong-a extradition bill dodaltute leh zirlai movement School Strikers-te pawh an lang a ni.
A ṭum thumna atan BTS
Korean Boy band BTS chu a ṭum thumna atan mi hneh thei zual TIME-in a thlanchhuahah hian an tel leh a, anni hian khawvel hmun hrang hrangah huhang an ngah hle.
Kumin April thla khan an EP parukna Map of the Soul: Persona an tlangzarh a, an tlangzarh hma hauh aṭang khan mi maktaduai thum aia tamin an order lawksa a ni. An hla "Boy With Luv" phei chu ram 65-a iTunes chart-ah pakhatna a ni hial.
Korean star zingah chuan an hlawhtling ber ti ila kan sawisual awm lo e, Billboard 200 chart-ah pawh an che ṭha hle a, The Beatles record-te pawh an lo nih rual tawh a ni. Hetiang a nih avang hian TIME-in mi hneh thei a thlanchhuah zinga an lang fo pawh hi thil mak a ni hran lo. Khawvel hmun hrang hrangah fan an ngah bawk em a ni.
Ariana Grande, Donald Trump, Duke and Duchess of Sussex
Ariana Grande kan hria a, a lar chhan pawh kan hria. He American singer, songwriter leh actress ni bawk hi a lar hle a, Grammy award hial pawh dawng thei a ni. Kum 26 mi Grande hian khawvel hmun hrang hrangah fan a ngah hle a, a lar belh zel dawn emaw tih tur a ni. Chanchin a ngah bakah Instagram lamah pawh follower mi maktaduai 159 chuang zet a nei a ni.
US President Donald Trump chanchin ngah zia leh khawvel news a luahkhah nasat zia sawi nawn a ngai lo a, twitter-a tweet a neih apiang news a tling zel emaw tih tur a ni. England lal fapate nupa, Prince Harry leh Meghan Markle-te hi an inneih hma hauh aṭanga chanchin ngah an ni a, an naute neih lar zia leh tunhnaia Markle-i'n red carpet a zawh ringawt pawh khawthlang media-ten an ngaihven zia news-ah hmuh tur a tam hle.