Emmy Awards nomination tichhuak Game of Thrones-in record siam

Emmy Awards 2019 nomination list chu nimin zing khan tihchhuah a ni a, Game of Thrones chuan record siamin drama category-ah nomination 32 zet a hmu.

Game of Thrones hian kum 1994-a NYPD Blue-in nomination hmu hnem record a siam chu a rawn khum a ni. NYPD Blue hi kum 25 chhung chu nomination hmu hnem ber lo ni tawhin, nomination 27 a lo hmu tawh a ni. 

Kit Harington chu GoT-a Jon Snow lema a channa aṭangin drama series-a best leading actor-ah nominate a ni a, Daenerys Targaryen lama chang, Emilia Clarke pawh best leading actress-ah nominee zingah a tel. GoT hi outstanding drama series, sound, visual effects, costume, make-up leh casting lamah award dawng thei tura thlanchhuah zingah a tel vek. Comedy category-ah 'The Marvelous Mrs Maisel' chuan nomination 20 zet a hmu bawk. 

Kumin September 22-a Los Angeles a sem tur, Emmy Awards 2019 dawng thei tura thlanchhuahte hi nimin zing khan The Good Place actress D'Arcy Carden leh Crazy Rich Asians actor Ken Jeong-ten Los Angeles-a Saban Media Center-ah an puangchhuak a ni. Kumina Awards sem huna host-tu tur hi puanchhuah a la ni lo.