Tripura: Left party-in nawrh huaihawt dawn

Tripura-a Left party chuan rural poll neih tura eptu party candidate-te vau an nih vanga lungawi loin vawiin hian Agartala-ah nawrh huaihawt an tum. 

Communist Party of India (Marxist) chuan inthlan neih tura atana nomination paper thehluh theih hun, July 1-8 khan BJP armed gang-te chuan eptu party-te chu nomination paper an thehlut turte lo dangin an lo vau tih an sawi. 

Tripura CPI (M) thupuangtu Gautam Das chuan, "Rorellai party BJP hian inthlanah eptu candidate-te an chak an hlau a ni. CPI(M) candidate 121-te vauin an nomination paper thehluh pawh hnukdawk leh turin an vau, hei vang hian panchayat inthlan neih turah 80% chuang chu chuhtu awm loin BJP an chak sa nghal a ni," a ti. 

Das chuan kum 2018 Septem­ber thlaa panchayat by-election neih ṭum pawh khan hetiang bawk hian thil a thleng tawh a, BJP chuan chuhtu nei loin seat 96% an la nghal a ni, a ti.  Nikum December thlaa urban poll neihah pawh eptu party candidate-te chu nomination an thehluh khapsak an ni tih a sawi bawk. 

Three-tier panchayat election hi July 27 hian neih a ni dawn. Inthlan neihna tur, Gram Pan­chayat seat 6,111-ah hian CPI(M) chuan candidate 310 chauh a nei dawn a ni.