Billboard Artist 100 chart-ah Taylor Swift pakhatna a ni

Billboard Artist 100 chart-ah Taylor Swift chu pangana aṭangin pakhatnaah a rawn invawrh a, kar hmasaa pakhatna Morgan Wallen chu pathumnaah a tla thla thung. Super Bowl Halftime show hnua rawn invawrh sang thar leh The Weeknd chu kar hmasaa a dinhmun pangngai pahnihna bawk a ni leh a ni.

Taylor Swift hi Artist 100 chart-ah hian kar 343 lai a lang tawh a, pakhatna a nih tawh zawng zawng belhkhawm chu kar 46 a ni tawh. Kar hmasa khan pangana a ni a, tunah erawh pakhatnaah a rawn invawrh leh a ni. Hei hi  'Love Story' a record ṭhat leh vang a ni a, 'Love Story' hi Hot 100 chart-ah 11-na a ni thung. 

Artist 100 chart-a lang rei ber chu Drake niin kar 347 lai a lang a, Taylor Swift hian a dawt a ni. Tunkar chart top 10 zingah chuan Swift hi chart-a lang rei ber a ni thung. Ariana Grande, BTS, Luke Combs, Juice WRLD, Billie Eilish, Dua Lipa leh Pop Smoke-te chu chart top 10-a langte an ni.

Olivia Rodrigo hla hit 'Drivers License' chu a la 'hit' chhunzawm zel a, Billboard Hot 100, Global 100 leh Global 100 Excl. US chart-ahte pakhatna a ni leh vek.

Hot 100 chart, Global 100 leh Global 100 Excl. US chart-ahte hian a zawnin kar ruk chhung pakhatna a ni vek bawk a, hei hian 'Drivers License' lar zia chu a tarlang chiang hle awm e. Billboard 200 chart pahnih (album chart tel loin) hi khawvel ram hrang hrang 200 chuanga hla an hralh dan leh stream tam dan azirin MRC data aṭanga siam a ni.

US tleirawl zaithiam hla 'Drivers License' hi kar hmasa khan vawi maktaduai 68.5 lai khawvel pumah stream a ni.

Morgan Wallen album 'Dangerous: The Double Album' chu a zawnin kar ruk chhung Billboard 200 chart-ah pakhatna a ni ta. Artist 100 chart-ah pakhatna aṭangin pathumnaah tla mah se US-ah chuan a album hi album hralh kal ber a la ni reng.

Super Bowl Halftime show hnua a album hralh kal thar leh The Weeknd 'After Hours' chu pahnihna a ni a, 37-na aṭangin pakhatnaah a rawn invawrh leh a ni. Lil Durk 'The Voice' chu pathumna a ni thung.